Amed de servîsê ciewnîyayîşê giranî pê nêweşanê Korona bîyî de. Qezayanê şaristanî de bi desan taxî gêrîyayî binê karantîna.

Amed de janê Korona çend şino vila beno. Şaristan de servîsê ciewnîyayîşê giranî pê nêweşan bîyî de. Qezayanê şaristanî de bi desan taxî gêrîyayî binê karantîna. Endamê Konseya Merkezî ya Odaya Tabîban ê Tirkan (TTB) Halîs Yerlîkayayî twitter de bale ant mesele ser.

Yerlîkayayî vilakerdişê xo de wina vat: ”Amed de nika rewşa nêweşanê giranan ê Kovîdî xirab a. Nêweşî semedo ke servîsanê ciewnîyayîşê giranî de ca çin o servîsanê lezabezan de yenê tepiştene. Servisê ciewnîyayîşê giranî dekerde yê. Eke tedbîrê lazimî nêrê girewtene ma do reyna bedelanê pîlan bidê.”

Sendîkaya Kedkaranê Weşîye (SES) a Amedî zî da zanayene ke vizêr şaristan de 14 kesî Korona ra merdî. Hetê bînî ra 6 taxê qezaya Bismilî; Embar, Aralik, Elîaçik, Gungeçtî, Sînanê û Melê Fetîya 2ê tebaxe de qasê 14 rojan gêrîyayî binê karantîna.

Qezaya Çinarî ya şaristanî de zî taxê Başakli, Karabab û Aşagi Konakî gêrîyayî binê karantîna. Başakli de 6, Karababa de 12 û Aşagi Konak de 15 keyeyî binê karantîna de yê.

Dekewtiş û vejîyayîşê nê taxan ameyî qedexekerdene. AMED