Nê rojanê Vîrusê Korona (Covid-19) ke pêroyê dinya girewto binê tesîrê xo de tayê aktîvîteyê ke derheqê dersanê kurdkî virazîyenî. Kesê ke biwazî nê rojanê ke keyeyanê xo de vîyarnenî dekerde derbaz bikerî, eşkenî ziwanê dayîka xo bimusî. Komeleya Cigêrayîşan ya Kurdan ya ke Stenbol de xebatan rayîr bena, kursê xo yê kirdkî (kirmanckî), kirdaskî (kurmanckî) û sorankî Vîrusê Korona ver betal kerdbî û nika înternetî ser ra bi hawayêkê onlineyî rê xo dewam kena. Hetê bînî ra mamostayê kirmanckî Mutlu Can xebatêk da destpêkerdene û çarçeweya na xebate de kesê ke biwazê kirmanckî bimusê, eşkenê bi perwerdeyê durî ra tewrê kursê kirmanckî yê Canî bibî û bi no hewa ziwanê dayika xo bimusî.
Dersê ke Canî do bido hewte de 1 roje û 2 yan 3 saetan ra awan bibo. Dersî do bi perwerdeyê dûrî ra û taybet bêrî dayene. Dersê kirmanckî sey komkî ney do şexsî bêrî dayene. Mamostayê kirmanckî Mutlu Canî qala dersan kerd û derheqê dersan û tewrbîyayîşê dersan de tay agahîyan da. Mamosta Mutlu Canî persanê ma ser o rojnameyê ma rê qisey kerd û tayê melumatî day.
‘Perwerdeyî ser o zî tesîr kerd’
Canî destpêkê qiseykerdişê xo de bale ante tewrbîyayîşê kursanê kurdkî ser û wina va: “Îzolosyanê sosyalî ke badê Vîrusê Covîd19î her welatê dinya de sey vernîgirewtîşo sereke ame destpêkerdiş sey zafê waranê cuye, perwerdeyî ser o zî tesîr kerd. Heme dinya de bi perwerdeyê dûrî ra perwerde alternatîfo zarûrî û tekane vejîya vernî. Kurdî parçeyêkê merdimahî yê û naye ra girêdaye normal o ke perwerdeyê kurdkî (kurmanckî-kîrmanckî) zî êdî bi nê metodî bêrê kerdiş. Bi mi bin o hewa kursî do vera-vera hîna vêşî bibê”
‘Seba musayîşî alternatîfêk o’
Canî qiseykerdişê xo wina domna: “Yew avantajo muhîm yê nê kursan zî no yo. Her bajar û her welatê dinya ra merdimî eşkêne beşdar bibê. Eke ma tayê cayan de çinbîyayîşê kursan yan zî dezgeyanê kurdan-kurdkî bîyarê xo vîrî ma faydeyê bi perwerdeyê dûrî ra hîna weş fehm bikê. Kurso ke ez organîze kena zî seba musayîşê kirmanckî alternatîfêk o. Taybetîya xo ya bingeyinê na ya ke ez do dersan xususen şexsan rê bida yanî yanî yew grûbe yan zî sinife rê ney. Naye ra girêdaye kontenjanê kursîyeran do zî sînorkerde bo. Bêguman amancê mino verên temînê ameyeyî (gelîr) nîyo. Aye ra heqê dersan do bi saetane û sewîyeya cûzî de bibo.”
Canî tewr peynî de semedê musayîşê ziwanê dayîke veng da û da zanayene ke kesê ke biwazî ziwanê dayîka xo bimusî eşkenî ê reyde têkilî ronî û wina qedêna: “Ziwan ke nêbo manaya miletbîyayîş çi ya? Bê ziwan û kulturî welatperwerîye nêbena. Coka ganî kurdî ememîyet bidê musayîşê kurdkî û îmkanê perwerdeyê durî ra îstîfadê bikê.”
