Wekîla Partîya Çepe ya Parlamentoya Ewropa ya Swêdî Maline Bjork dîyar kerde ke Tirkîya başûrê Kurdîstanî de çekê kîmyewîyî şuxilnaya û Servîsê Têkilîyanê Teberî yê Yewîya Ewropa rê vernîyazêkê persan pêşkêş kerd.

Maline Bjork vist vîrî ke Tirkîya 24ê nîsane de dewleta tirke başûr de dest pê hêrişanê neweyan kerd û derheqê sûcanê şerî de wina vat: ”Hêrişan de çekê kîmyewî şuxilîyenê. Şuxilnayîşê çeka kîmyewîye sûc o û binpaykerdişê huqûqê mîyanneteweyî yo.

Goreyê çapemenîya mîyanneteweyîye sivîlî hêrişan de neçare mendî ke dewanê xo biteriknê. Rîsk esto ke sivîlî birîndar bibê yan zî bimirê. Nê hêrişî manenê hêrişanê Tirkîya yê vera rojawanî. Hukmatê Iraqî destûr nêda ke dewleta tirke bi hawayêkê leşkerî welatê înan de têbigêra. Wezîrê Karanê Zereyî yê Iraqî Fuad Huseyînî ard ziwan ke hêzê tirkî pê rayîranê îlegalan dekewtî mîyanê welatî. No yeno manaya binpaykerdişê serwerîya Iraqî.

Coka Servîsê Têkilîyanê Teberî yê Yewîya Ewropa (EEAS) ra persena:

-Hayîya EEASî pê raporanê şuxilnayîşê çeka kîmyewîye esta?

-EEAS do çalakîyanê leşkerîyan û şuxilnayîşê çeka kîmyewîye yê Tirkîya şermezar bikero?

-EEAS do senî vera xîretê leşkerî yê Tirkîya nêrazîbîyayîşê xo bimojno?”