Serekê Pêroyî ê Partîya Ameyoxî Ahmet Davutogluyî derheqê îstîfakerdişê xo yê serektîye de vat ke Yildirim, Albayrak û Soylu bi koordînasyonê Serekkomarîye mi rê dek û dolap viraştî

Badê îtîrafanê îdarekarê çeteyo pabesteyê dewlete Sedat Pekerî, Wezîrê Zerreyî Suleyman Soylu tewrê Haberturkî bî û derheqê Serekê Pêroyî ê Partîya Ameyoxî Ahmet Davutogluyî deîdîayanê cîdîyan eşt raşte. Soylu benameyo ke tewrê ci bî de vat ke badê weçînayîşê 7ê Hezîrane waşt ke CHPyî reyde koalîsyon virazo û wezîran rê vat ‘Odeyê şima pêronan yeno goşdarîkerdene û ez zana şima çi qisey kenî’.

Serekê Pêroyî ê Partîya Ameyoxî Ahmet Davutogluyî zî badê îdîayan tewrê bernameyê Fox TV ê Îsmaîl Kuçukkayayî bî û cevab da îdîayan. Davutoglu, Soylu xora îtîraf kerd ke o wext semedo ke ez gure ra bêra girewtene mi rê komplo viraşto. Davutoglu persê ‘Beno ke hayîyaya Serekkomarîye çinî bo’ ê Kuçukkayayî rê vat ke ‘Nêbeno ke çîyêko winasî bê xebera Serekkomarîye bibo’.

Davutoglu vat: “Mi embazanê xo nêda goşdarîkerdene la Soylu îftîrayanê alçaktîyan keno. Destê ci de polîs, îstîhbarat esto, wa muracatê MÎTî bikero. Eynî wext de îftîra erzeno Serekkomar Erdogan û Wezîrê ci ra ver Efkan Alayî zî. Çimkî vano ke bêhayîya Serekkomarîye çîyêko winasî nêbeno. Yildirim, Albayrak û Soylu bi koordînasyonê Serekkomarîye mi rê komplo viraştî. Nê hirî kesî yewbînan werdî û raşte mend mafya rê. Mustafa Şentop ame mi rê vat ke Soylu kîmyaya partî xira keno. Soylu vano ke ‘merdimê vindîbîyaye çin î’. Di dewijî Van de helîkopterî ra ameyî eştene, terorî reyde wina têkoşîn beno.”