Wendekaranê Unîversîteya Munzurî 34 ciwan û domanê ke Qirkerdişê Roboskî de ameybî qetilkerdene bi kayêkê tîyatroyî yad kerdî.

28ê kanûna 2011î de teyarayanê şerî yê dewleta tirke dewa Roboskî ya qezaya Qilebanî ya Şirnexî de domanî zî tede 34 merdimî qetil kerdbî. Wendekaranê Munzurî yê Dêrsimî serrgêra Qirkerdişê Roboskî de seba vîrameyîşê qurbanan aktîvîteyêke kerde.

Wendekaran kampusê zanîngehî de kayêkê tîyatroyî viraşt û dima zî şîîra ’34 Gulle’ wende ke na şîîr hetê Rênas Jiyanî ra seba vîrameyîşê 34 qurbanan amebî nuştene.

Rêxistina Partîya Demokratîke ya Şaran (HDP) ya Çewlîgî verê kuleya saete de bi eşkerayîyêke qurbanê Qirkerdişê Roboskî yad kerdî.

Parlementerê HDPyî yê Çewlîgî Erdal Aydemîrî eşkerayîye ra verî qisey kerd û vat: ”Rixmo ke 10 serrî vîyartî çewî nê qirkerdişî ra nêame muhakemekerdene, dosyaya qirkerdişî ameye qefilnayene. No zî hîsê edaletî yê merdiman dejneno. 100 serrî zî bivîyarê ma do hesabê nê qirkerdişî bipersê.”

Dima Hemserekê HDPyî yê Çewlîgî Hasan Soysalî eşkerayîye wende. Eşkerayîye de ame waştene ke Qirkerdişê Roboskî bi hawayêkê hîrayî bêro cigêrayene, mesuldar û kiştoxî bêrê cezakerdene. DÊRSIM