Şarê Amedî eno rojan de verva yew herîşê neweyê yo. Ena ray mîyanîya hêrîşan de nameyê serverê MHPyî Devlet Bahçelîyî vêreno. Labelê verva enê biryarê Walîtîya Amedî şarê kurd nerazîbîyayîşê xo bi vengê berz nîşan dano, sey serra 1975î…
Ez wazena verê tikî ena mesela akera û tirapey serê tekîlîya Amed û MHPyî de vindera.
Qeyûmê Amedî serê Koyê Kirklarî de dest bi awankerdişê daristanî kerdo. Donima weyine ameyo qedênayîş û nameyê daristanî zî “FETÎH” ameyo ronayîş. Mîyanê plananê Walîye û rêxistina MHPyî ya Amedî de semedê donima diyîne zî ronayîşê nameyê “DEVLET BAHÇELΔ dayin esto. Walîyê Amedî û partîya nijarperest ya tirkî eno hêz kura gênê.
Heme kes baş zano ke eno plan tena ê Walîyê Amedî û MHPyî nîyo, eno plan bingehê xo serra 1975î ra, hêrişê sistematîkî yê asîmile kerdina ziwan, kamî û virê kurdan ya dewleta tirk ra gêno.
Amed roja awakerdina Komara Tirkîya ra heta ewro verva sîyasetê raşt û nijarperestan vejîyayo. Taybetî zî partîyê nijarperestî Amed de ne rayan girewtî, ne zî yew namzet eşkayî bivejnî. Tarîxê Amedî tekoşînê verva nijarperestê tirkan sereberz o.
Serra 1975î de reyna serverê MHPyî Alparslan Turkeş çapamenî de eşkere kerdbî ke wazeno şêro Amed û ewja de yew mîtîng virazo. Heta çapemenî de semedê Amedî watînê “Moskova’ya şenik”. Nijarperestê tirkî aye roje zî sey ewro semedê kurdan watêne şima ya benê tirk yan zî şima mirenê.
Amed zî bi karekterê xo yê xoverdayîşî verva nijarperestî aye rojan de zî ne ray da MHPyî, ne zî ena partî qebul kerdî. Labelê rayna zî Alparslan Turkeş bi israr waşt şêro Amed û mîtîng virazo.
Peynîya eno israrî de se bî? Bêrê ma têreyde biewnî aye roje…
Rojêk şarê Amedî pê hesîya ke Alparslan Turkeş yeno Amed û warişt payan sero. Verva konvoya MHPyî çalakî viraştî. Heme cayê sûke de adir amê tafînayîş, serê heme kuçeyan de barîkatî ameyî amadekerdiş.
Şarê Amedî aye roje çalakîya xo ya yewine meydanê Şêx Seyîdî (Dağkapı Meydanı) de platformê mîtîngê Turkeşî xirabe kerd, serê enê çalakîye leşker û polîsê dewlata tirkî hêrîşê şarî kerd. Bi eno hêrîşê zaf tenî cuya xo vînî kerdî û birîndar bîyî. Labelê rayna zî yew gamêk tepîya nêeştî û heme cayê sûke kerdî raşteyê xoverdayîşî.
Eno tarîx semedê tekilîya Amed û nijarperestîya tirkan bî miladêk. Aye roje ra heta ewro nijarperestê tirkan û partîya MHPyî nêeşkayî Amed de tu rayêk bigêrî. Aqilê dewleta tirkî 47 serrî ra pey wazeno nijarperestîya tirkan bi nameyê Dewlet Bahçelî deko Amed.
Eno gam xo ser nêameyo eştiş. Goreyê fikrê mi, peynîya enê gamî de dewlete bi xo esta. Çimkî dewlete eno 7 serrî yo, sîyasetê xo serê qedênayîşê şarê kurdî dekerdo dewre. Taybetî zî sûka ke tekoşînê şarê kurdan de bîya sembol hedef gena. Eno gamê peynî yo ke semedê Amedî ameyo eştiş eno sîyasetê ra azade nîyo.
Na rewşe terafê şarê Amedî ra nîna qebul kerdin.
Şarê Amedî gama yewine vist. 11ê aşma çeleyî de hunermed, endamê sazîyên sivîl serê Pirdê Des Çiman (On gözlü Köprü) de eşkere kerdî ke “Nameyê Devlet Bahçelî Amed de nêwazenê”. Eno gam ra pey hema hema heme amedijî verva mîkrofonan vatişê xo wa û Devlet Bahçelî rê karto sûre nawit.
Yew qalêko pîlan esto “Kê qala temam herî ra vano”, şarê Amedî verva nijarperestî helwestê xo eşkera kerd. Hele ma veynî Devlet Bahçelî zî sey serverê MHPyî yê verine Alparslan Turkeşî xo rezil keno yan nê!
