Dewaya Kobanê ke hemserekê verênî yê Partîya Demokratîke ya Şaran (HDP), endamê Rayberdişê Merkezî û îdarekarê HDPyî zî tede 24ê ci tepişte 108 sîyasetmedarî yenê muhakemekerdene vizêr 22. Mehkemeya Cezaya Girane ya Anqara de roniştişê ci yê 3. dewam kerd.
Mehkeme de Zekî Çelîk, Îbrahîm Bînîcî, Emîne Beyza Ustun û Emîne Ayna bi şertê kontrolê edlîyî, qedexeyê vejîyayîşê teberê welatî û hewte de di rey eştişê îmazayî ameyî tehlîyerdene û roniştişo bîn 20ê êlule rê ame pey de eştene.
Kesê ke ameyî tehlîyekerdene Zîndanê Sîncanî ra vejîyayî. Parlementerê HDPyî Mehmet Ruştu Tiryakî û Mahmut Togrul û merdimê tepişteyan û avûtê ci şîyî vera înan.
Beyza Ustune gama ke vejîyaye teber slogana ”Cinî cuye azadîye” eşte, keyfweşîya xo ard ziwan û mesajê pîlkerdişê têkoşînî dayî. Emîne Ayna zî vat ê hêvî kenê ke rojê ke sîyaseto alternatîf sûc nêyo înan pawenê. Zekî Çelîkî zî semedê paştdayîşî spas kerd û ard ziwan ke seba ke embazê înan zere de yê ê zerteng ê. Îbrahîm Bînîcî zî vat têkoşîn dewam keno û tewr peynî do heme embazê înan serbest bêrê veradayene.
Hemserekanê Pêroyî yê HDPyî Mîthat Sancar û Pervîn Buldane zî kesê ke zîndanî ra vejîyayî înan reyde pê telefonî qisey kerd. ANQARA
