Rojnameya Heftane

Gelo Dêrsim de se beno?

Valêre

Embazêne sere de ma çend hedîseyanê ke tewr zêde ameyî eşnawitene ke Dêrsim de ameyî cuyayene bikerî şima vîr.

*Wendekara Unîversîteya Munzurî Gulîstan Dokuya 21 serrî 5ê çeleyî ra nata vindîbîyaye ya. Netîceya xebetanê cigêrayîşî de Gulîstane ra rêçêk nêame dîyene û tehqîqatê serdozgerîye zî aver nêşino. Xeberan de tena nameyê Zainal Abarakovî ke babîyê ci polîs o yeno eşnawitene.

*Xeberan de ame vînayene ke qezaya Pêrtagî ya Dêrsimî de zaf domanê lajî yê ke serrê înan mabênê 11 û 16î de yê maruzê îstîsmarê cînsî bîyî.

* Qezaya Pulurî ya Dêrsimî de Çimeyê Munzurî binê nameyê ‘turîzmî’ de bi projeyêkî seba rantî yenê pêşkêşkerdene. Bêdestûrê hemwelatîyan pê îhaleya peyzajî warê Çimeyanê Munzurî yenê talankerdene. Çarçeweya projeyê Çimeyanê Munzurî de tena xoza nîno talankerdene, cayanê bimbarekî zî yenî texrîbkedene.

*Heto bîn de Dêrsim de di birayê bi nameyê Mehmet û Bozkurt Aydemîrî yê ke 13ê êlule de şîyênî Parka Neteweyî ya Dola Munzurî, nizdê dewa Venkî de bibî vînî. Birayan ra sere de meyîtê Bozkurt Aydemîrî amebi dîyene û dima ra meyîtê birayê bînî yê Mehmet Aydemîrî badê 10 rojan Çemê Munzurî de ame vînayene.

Merdim eşkeno xeylê xeylê hedîseyanê winasîyan rêz bikero û tena nuşte nê serê înan de romanan binusno. Ripel mirdê nuştişê hedîseyan nêkenî. Kam cayê dinya de beno wa bibo merdimo ke merdimayîya xo ra dûrî nêkewto, wexto nê hedîseyan eşnaweno ya zî vîneno zaf pê qehirîyeno û dejeno. Êdî hewnî zî bîyî tarî û çîyê ke merdim eşnaweno şewe yenê xeyalanê merdimî.

Çi ameye serê Gulîstane hema zî nîno zanayene. Çi heyfo ke bi aşman o cigêrayîşêk yeno kerdene la o zî bênetîceyo. Hedîseyê Gulîstane de xeylê çîyî yenî vîrê merdimî. Xeylê persê bê cewab estî. Çi rê derheqê hedîse de tu kesêk nêameyo tepiştene û vînîbîyayîşê Gulîstane sey ‘xokiştişî’ yeno mojnayene. Merdimêk bîlasebeb xo kişena qey? Qey tena sucê ke mîyanê cemaatî de yenî kerdene, sey suc yenî hesîbnayene û sucdar tena o wext yeno sucdarkerdene. Pêroyê hedîseyan de kesê peynîya perdeyan nînê vînayene. Çi heyfo ke wexto ke babete bena cinî pêroyê dinya de huqûq beno yew o. Dinya vera cinîyan de ya û cinî zî vera dinya de têkoşîn danî. Cinî her cayê dinya de yena pelçiqnayene û sey metayêka cinsî yena vînayene.

Hedîseyê Gulîstane hêdî hêdî yeno vîrîkerdene û seba ke vîrê cemaatî ra bêra çinkerdene medya de ca nêdîyena Gulîstane. Gulîstane û xeylê cinîyê bînî bîyî qurbanê sîstemê serdestan, yanî ê camêrdan. Her kiştiş û xokiştişê cinîyêk de tesilî engişta camêrdêk esto. Wexto ke cinî goreyê qaydeyanê camêrdan tênêra o wext bena hedefê camêrdanê dormeyê xo û tewr peynî ya yena kiştiş û ya zî xo kişena. No camêrd mêrde, heskerdox, bira, pî, dat, xal û swb. yî.

Hedîseyê qezaya Pêrtagî ke zaf domanê lajî yê ke serrê înan mabênê 11 û 16î de yê maruzê îstîsmarê cînsî ameybî. Camêrd êdî rayîr ra vejîyayo û bîyo cinawir. Êdî ci rê her çîyê gandar û merde sey objeyêko cinsî asîyeno. Xora eke exlaq bibayêne cemaat de hende sucê bêexlaqî nêameyêne kerdene. Vatiş û nuştişê eno hedîseyî zaf zehmet o.

Dêrsim de di birayê bi nameyê Mehmet û Bozkurt Aydemîrî yê ke 13ê êlule de şîyênî Parka Neteweyî ya Dola Munzurî, nizdê dewa Venkî de bibî vînî. Sere de meyîtê birayêk û dima ra zî meyîtê birayo bîn ame vînayene. Ê senî merdî ya zî ameyî kiştene nîno zanayene, la ganî canê merdimêk hende erzan nêbo. No prorsesê korona ke rojêk de xeylê kesî mirenê de merdim estê ke seba xelisnayîşê canê xo pêroyê malûmilkê xo bikerê feda. Ganî merdim ne canê xo bikero qurbanê tay kesan û ne zî tay kesî canê merdiman bikerê qurbanê xo.

Rewşa qezaya Pulurî ya Dêrsimî ke Çimeyê Munzurî binê nameyê ‘turîzmî’ de bi projeyê peyzajî yenê talankerdene û seba rantî yenê pêşkêşkerdene werte de ya. Çarçeweya projeyê Çimeyanê Munzurî de tena xoza nîno talankerdene, cayanê bimbarekî zî yenî texrîbkedene. No sîstem ne qiymet dano cinî ne dano doman, xoza, bawerî, kultur, merdim û swn. yan. Coka merdimîye na rewşe de ya. Cezakerdişê sucan çin o. Eke her sucêk de kerdox biameyêne cezakerdene do camêrdêk zîndanê akerde ra fîrar nêkerdêne û bi hawayêko keyfî cinîya (Cerene) ke qet nêşinasneno nêkiştêne. Eke bedilnayîş nêbî do halê ma zî wina dewam bikero.