Heyetê KCD û DBPyî Çewlîg de şarî reyde ame yewca. Hemserekê KCDyî Ozturkî ard ziwan ke tecrîdkerdişê Rayberê Şarê Kurdî Abdullah Ocalanî tecrîdkerdişê pêro welatî yo.
Hemserekê Kongreya Komelê Demokratîkî (KCD) Berdan Ozturk, Hemserekê Partîya Herêman ê Demokratîkan (DBP) Salîha Aydenîz û Keskîn Bayindir sey heyetî dewê Tuglayan, Qerxabazar, Çirkara, Hacîyon û Çîllî Golî yê qezaya Kanîreşî yê Çewlîgî zîyaret kerdî. Hemserekê HDPyî Arzu Firat û Hasab Soysal û Wekîlê Partîya Demokratîke ya Şaran (HDP) yê Çewlîgî Erdal Aydemîr zî tewrê heyetî bîyî. Merkezê Kanîreşî de hemwelatîyan pê çepikan, tîlîlîyan û pankarta ‘Ma vera faşîzmî xo birêxistin kenê’ heyetê KCD û DBPyî pêşwazî kerd. Cinîyan vilî dayî heyetî.
Hemserekê KCDyî Berdan Ozturkî zîyaret de qisey kerd. Ozturkî vist vîrî ke tecrîdkerdişê Rayberê Şarê Kurdî Abdullah Ocalanî dewam keno û şexsê ey de pêro welat yeno tecrîdkerdene. Ozturkî vat: ”Bi hezaran embazê ma tepişte yê. Embazê ma yê tepişteyî 200 rojan ra zêdêr hê grevê vêşanîye de yê. Coka seba azadîya Ocalan û tepişteyan ganî verî ma xo azad bikerê. Îqtîdar wazeno HDPyî biqefilno la do ser nêkewo. HDP bi xo şar o. Ma do vera zulm û tedayan têkoşînê xo pîlêr bikerê. Seba ma fikr û tecrubeyê şarê ma girîng o, naye ra ma ameyî tîya.”
Keskîn Bayindirî zî zîyaret de qisey kerd û ard ziwan ke vera ziwan, kultur, bawerî, cinîyan û erdê kurdan hêrişê giranî estê. Bayindirî vat: ”Ê her roje televîzyonan de propagandayan şerî kenê. Ma Newroze de cewabê înan da. Ma do qetî îrade û bawerîya xo medê destê înan.”
Hemwelatîyan zî pare kerd ke vera propagandayanê îqtîdarî ê do wayîrê têkoşînî vejîyê û îqtîdar do nêeşko îradeyê kurdan bişikno. ÇEWLÎG
