Wekîlê Serektîya Grûba Partîya Demokratîke ya Şaran (HDP) ê verêne Îdrîs Balukeno ke Zîndanê Sîncanî yê Anqara de yeno tepiştene, badê demêko derg çapemenî rê qisey kerd. Baluken rojnameyê Yenî Yaşamî rê Gulcan Derelî û Huseyîn K. Akçadagî reyde qisey kerd.
Baluken pêvînayîşê xo de bale ant Tecrîdê serê Rayberê PKKyî Abdullah Ocalanî û grevê vêşanîye o ke zîndananê Kurdistan û Tirkîye de dîyayo destpêkerdene ser o û wina va: “Tecrîd çarçeweya şexsî û komelkî de qet bi normê merdimîye, wijdan, ehlaq, komel ya zî tu bawrîyêk reyde pê nîno. Tecrîd eksê huqûqî, mewzuatê Qanûno Bingeyî û pêkerdişê mîyanneteweyî yo. No suc vera merdimê de yeno kerdene.
Derheqê babete de hewldayîş û waştişê seba wedarnayîşê tecrîdî benê bahane ke îradeya aştîye timî bêro ganîkerdene. Verê ke zîndanan de merg virazîyo, ganî heme dormeyê ke hesreta azadî, aştî û demokrasîye kerdî, semedê na mesela paştîdayîş bidî. Ganî Partîyê sîyasî, STK, sendîka, rêxistinê meslekî, dezgeyê sey heqê merdiman û sewbîna roşnvîr, hunermend, heskerdoxê aştî tewrê ci bibî.”
Pêvînayîş çareserî aver berdêne
Baluken persanê rojnamegeran de cewabê pêvînayîşê komîteya Îmrali zî da û dewam kerd: “Munaqaşayê heyetê ma ê ke birêz Ocalan û heyetê dewlete reyde ameyêne kerdene de averberdişê prosesî ameyêne waştene. Nizdîbîyayîş û ercnayîşê şaş benê sebeb ke persê kurd xorîtir bibo. Bi no hawa Tirkîya mîyanê komelê mîyanneteweyî de tena manena.”
Ganî paradîgma rayîrê hirêne bixebetna
Baluken derheqê padîyayîşê HDPyî de zî qisey kerd û va: “Ma xerîbê nê qedexe û tepiştişan nîyê. Wazenê HDP bêveng bibo. Şexsê HDPyî de wazenê raşteyê sîyaseto demokratîk û heme bindestê welatî bitepişî. Ganî xeta xoverdayîşî ya tewr hîra bêra raştkerdene, reaksîyon û nizdîbîyayîşê sîyasî, huqûqî, komelkî bêrî vînayene. Coka ra ganî HDP paradîgmaya xo ya rayîrê hirêne bivejno aver yan zî bi dayîşşinasnayîşêk hîna zelale şarî îqna bikero.”
Ganî roşn nêro hewakerdene
Baluken peynîyê qiseykerdişê xo de veng da şarî û wina qedêna: “Ez wazena hêvîya şarê ma nêra şikitene. Ganî roşnaya piştîya mijî nêro hewakerdene. Ez û embazê xo ê qoxuşî M. Alî Bul (Hemserekê Şaredarîya Dêrsimî) silamanê xo ê german şarê xo yê bierc û welatperwerî rê raykenî.”
