Rojnameya Heftane

‘Jineolojî bû sedema guhertinên girîng’

Bi avakirina Komîteya Jineolojiyê û xebatên ku di vê qadê de tên kirin, li rojavayê Kurdistanê bû sedema guhertina hişmendiya civakê û perwerdekirina ciwanan.

Akademiya Jineolojiyê fikra jiyana azad û wekhev, bi 4 rêyan; Navendên Jineolojiyê, Dibistan, Enstîtuya Andrea Wolf, Fakulteya Jineolojiyê li nav civakê belav kir. Der barê kar û xebatên Komîteya Jineolojiyê yên salekê de endama Komîteya Jineolojiyê ya Herêma Firatê, Dîrok Qehreman nirxandin kir.

Qehreman diyar kir ku rista jineolojiyê ew e ku li hember zihniyeta desthilatdarî, tundî û êrîşên li dijî jinan û civakê tên meşandin, analîzkirina bi zanisteke rast bê bipêşxistin û çareseriyek bê dîtin. Qehreman da zanîn ku erka jineolojiyê ya sereke di astên civakî de bi gelemperî di guherîn û veguherîna wan de pêşengiyê bike û wiha got: “Bingeha civakê ciwan in. Bi taybetî da ku li hember zihniyeta zayendperestî û desthilatdariyê were sekinandin, jin û ciwan xwe hîn bêtir di asoyên pir kûr de nas bikin, li dibistanên amadeyî li seranserî bakur û rojhilatê Sûriyeyê waneyên jineolojiyê tên dayîn. Wekî gaveke gelekî baş li herêmên rizgarkirî wekî Minbic,Tebqa, Reqa û Dêra Zorê di vî alî de hat avêtin.”

- Advertisement -

Di axaftina xwe de Qehreman destnîşan kir ku bi avakirina Fakulteya Jineolojiyê ya li Zanîngeha Rojava kûrbûna jineolojiyê jî di nav pergala perwerdeyê de cihê xwe girtiye û diyar kir ku li herêma Firatê cara yekem mêr li gorî zanista jin û jiyanê li akademiyan hatine perwerdekirin.

Qehreman axaftian xwe wiha bi dawî kir: “Hêvî û armancên me ew bûn ku em wekî Komîteya Jineolojiyê bikaribin bi rengekî zanistî jin xwe bi rê ve bibe, guhertinên heyî bi rengekî zanistî analîz bikin û jê re bibin hêza çareseriyê. Di salên pêşiya me de jî em ê xebatên xwe berfirehtir û kûrtir bikin.”  QAMIŞLO