Rojnameya Heftane

Kurd berê xwe didin lîstikên bi kurdî

Navenda Nûçeyan

Leyzok, sepana lîstikeke bi zimanê kurdî ye û ji aliyê Ferhat Baysal ve hatiye amadekirin. Ferhat Baysal du meh berê wekî gelek kesan di rojên pandemiyê de berê xwe dide zimanê dayikê û dest bi avakirina aplikasyona bi navê leyzokê dike. Di bin sîwana navê Leyzokê de bi kategoriya ‘pirs’ê dest bi amadekirina lîstika bi kurdî dike. Der barê naveroka sepanê de Baysal wiha got: “Ya rastî gelek projeyên min hene ku di bin sîwana Leyzokê de gelek lîsktikên kurdî ava bikim ku kurd jî bibin xwedî lîstikên dijîtal û bikaribin bi hev re bilîzin.”

Ferhat Baysal ji Kerborana Mêrdînê ye û niha li Belçîkayê dijî. Li Belçîkayê karên Endezyariya Nivîsbariya Kompûterê û karên dîzayna dijîtalê (photoshop) dike. Baysal der barê aplîkasyonê de bal kişand ser kêmasiyên lîstikên dijîtal ên bi kurdî û diyar kir ku bi sedema her kurdek bi zimanê xwe jî lîstikan bilîze ev lîstik amade kiriye.

Lîstikên nifşên nû

Avakarê sepana Leyzokê Baysal bal kişand ser pêdiviya lîstikeke bi kurdî û diyar kir ku êdî nifşên nû zêde ji nivîsên dirêj hez nakin û ji ber vê yekê jî wî berê xwe daye ser xebateke bi vî rengî. Di axaftina xwe de Baysal ev tişt anî ziman: “Gelek ciwan êdî wextê xwe bi telefonan derbas dikin. Bi lîstikên biyaniyan dilîzin û tenê hînî çanda wan dibin. Êdî bila kurd jî berê xwe bidin lîstikên bi zimanê xwe. Kesên dixwazin ji hînbûnê kêfê bistînin û bi hevalên xwe re bikevin pêşbaziyê, dikarin vê aplîkasyonê bi kar bînin.”

10 hezar pirs bar kirin

Leyzok lîtikeke ku bi du kesan bi hev re tê lîstin. Di hundirê lîtikê de pirsên têkildarî sînema, şano, bawerî, werzîş, erdnîgarî, naskirina kesan, ziman, wêje, dîrok, muzîk, gotinên pêşiyan û gelek beşên din ên li ser zanîna çandên biyanî hene. Ferhat Baysal heta niha 10 hezar pirs lê bar kirine û dê her biçe pirsên xwe zêde bike.

Di axaftina xwe de Baysal da zanîn ku her ku diçe rastî eleqeyeke baş tê û ji bo ku Leyzok hê bi hêztir bibe, kesên dixwazin dikarin pirsan amade bikin û wiha domand: “Gelek kes ji bo Iphonê jî dixwazin, min ji bo IOS’ê jî şandiye lê li benda erêkirinê ye. IOS ne weke androîdê ye, erêkirina wê piçek dem dixwaze. Di demeke nêzîk de ji bo Iphoneyê jî wê were bikaranîn.”

Ferhat Baysal ji bilî Leyzokê ji bo zarokan jî lîstikeke kurdî ya bi navê “Stêrgerê Kurd” amade kiriye û kesên dixwazin jî dikarin ji “Play Store”yê daxînin telefona xwe.

Her wiha Baysal bi navê “Copy Paste” xebatek li ser youtubeyê jî daye destpêkirin. Di vê xêbatê de jî stranên ku ji kurdan hatine dizîn bi awayekî otomatîk tên qeydkirin û têkildarî vê yekê Baysal diyar kir ku bi vê xebatê jî stranên ji kurdan hatine dizîn wê wan derxe holê.