Li kolanên başûr rojavayê Îranê, derdora hefteyekê ye her ku diçe xwepêşandanên li dijî kêmbûna avê zêde dibin. Di navbera xwepêşandaran û hêzên ewlekariyê de pevçûnên dijwar rû didin û ji her du aliyan kuştî û birîndar hene.

Rejîma Îranê xwepêşandaran tawanbar dike û dibêje ku di nava wan de kesên çekdar hene û wan polîsekî hêzên ewlekariyê kuştiye.

Ji aliyekî din ve çalakvanên muxalefetê bang li gel kirin ku tev li xwepêşandanan bibin û hin dîmenên van xwepêşandanên Xozistanê li ser malperên civakî hatin parvekirin. Îro serê sibehê jî dîmeneke xwepêşandana komeke jinan li rawestgeha metroyê ya Tehranê hat belavkirin û tê de sloganên ‘Bimire dewleta Islamî, Bimire Xumeynî’ hatin berzkirin.

Hêjayî gotinê ye ku kêmnetewa ereb piranî li herêma Xozistanê dijî û her dem tîne ziman ku ew rastî bêedaletî û cudakariyê tên. Her wiha di 50 salên dawî ev krîza herî mezin a kêmbûna avê ye û bandoreke mezin li ser jiyana gelek mirovan kiriye. Di encama kêmbûna avê de bandoreke mezin li ser jiyana gelê herêmê hatiye kirin ji aliyê çandinî, xwedîkirina sewalan û kêmbûna elektrîkê ve pirsgirêkên mezin tên jiyîn.

Li gorî çalakvanên mafên mirovan di rojên duşem û sêşema borî de zêdeyî 30 xwepêşandanan li deverên cuda hatine lidarxistin. Li gorî dîmenên ku vê sibê jî hatine belavkirin xwepêşandan berdewam dikin. di encama destwerdana hêzên ewlekariyê de 5 kesan jiyana xwe ji dest daye, her wiha tankeke pasdaran hatiye şewitandin.

Her wiha ne tenê li Îranê li Sûriye û Iraqê jî krîzeke mezin a kêmbûna avê heye piştî ku hikûmeta tirk ava çemê Firat û Dicleyê biriye û gelekî kêm kiriye. Li cihê ku diviyabû di her saniyekê de 500 mk av ji çemê Firatê biherike Tirkiyeyê ew rêje daxistiye 200 mk.