Li Iraqê navendên taybet ên hilbijartinê deriyên xwe ji bo hilbijêran vekirin. Di vê dengdanê de dê artêş, hêzên ewlekariyê û polîs tev li vê dengdana taybet bibe. Dîsa dê girtiyên zindanan tev li vê dengdanê bibin. Ev dengdan beriya hilbijartinên giştî bi 48 seatan pêk tê.
Berdevka saziya bilind a hilbijartinan Cumana El Xelayî der barê dengdana taybet de ji ajansa Sky Newsê re axivî û wiha got: “Hilbijartin roja înê (8 cotmeh) serê sibehê seat di 7’an de dest pê dike û seat di 6’ê êvarê de bi dawî dibe. Hejmara leşker û hêzên ewlekariyê yên ku dê tev li vê dengdanê bibin milyonek û 75 hezar e. Her wiha dê 120 hezar koçber jî tev li vê dengdanê bibin. Girtiyên zindanan yên ku cezayê wan kêmî 5 salan e jî tev li vê dengdanê dibin.”
Wekî tê zanîn hejmara berendamên van hilbijartinên pêşwext 3 hezar 200 kes e. Ji wan 951 endamên jin in.