Lîstîkên kurdî yên li ser dijîtalê roj bi roj zêde dibin. Herî dawî lîstika bi navê ‘Peyvên Kurdî’ ji aliyê Ferhat Baysalê ku li Belçîkayê dijî û karên Endezyariya Nivîsbariya Kompûterê dike, hat çêkirin.

Baysal bi destpêka pandemiyê dest bi xebatên ziman dike û aplîkasyona bi navê ‘Leyzok’ê  ji bo zarokan amade dike. Di bin sîwana navê Leyzokê de bi kategoriya ‘pirs’ê û lîstika bi navê ‘Stêrêgerê Kurd’ diweşîne.

Endezyarê Nivîsbariya Kompûterê Baysal beşeke din a lîstikê bi navê ‘Peyvên Kurdî’ li aplîkasyonê zêde kir û bi zaravayê kurmancî amade kir. Lîstika ku ji hilbijêrka zimanên îngilîzî, almanî, fransî, spanî, îtalî, rûsî û tirkî pêk tê, der barê dîrok, ziman û çanda kurdî de kesên dilîzin, agahdar dike.

Baysal ku heta niha 30 hezar peyv li sepanê bar kirine, diyar dike ku her biçe dê hejmarê zêde bike. Baysal dixwaze di bin sîwana ‘Leyzok’ê de gelek berhemên ku xizmeta zimanê kurdî dikin, gelek berheman hilberîne.

Têkildarî şêwaza bikaranîna lîstikê ‘peyv’ Ferhat Baysal destnîşan dike ku ji gelek zimanan pêk tê û  her zimanek ji gelek astan pêk tê û wiha dibêje: “Heya astek neqede astên din qufilkirî dimînin. Dema mirov astan diqedîne, mirov dibe xwediyê jeton û pileyan. Ji bo her dîtina peyvan pile tê dayîn. Wekî din di hundirê aplîkasyonê de divê ku lîstikvan fêrî kurdî bibe. Eger hûn bixwazin kurdiya xwe bi pêş bixin teqez bilîzin. Di dawiya lîstikê de hûn ê bêtir fêrî zimanê kurdî bibin. Jixwe hûn dikarin bi zimanên din jî bilîzin û fêrî gelek peyvan bibin. Di navê de beşa îstatîstîk û encama pêşbirkê jî heye ku lîstikvan û kesên beşdar, dikarin bi hêsanî bigihîjin agahiyên der barê lîstika xwe û yên din de.” STOCKHOLM