Eno rojan de Qesra Erdoganî semedê sîyasetmedaranê Iraq û Herema Kurdistanî biyo rayîrê awî. Yew sîyasetmedar şono ay bîn yeno. Peynîya her zîyaretî zî hêriş û zext ser yew bîyayişê kurdan vêşî beno.

4ê aşma Êlulê Neçirvan Berzanî, 27ê aşma Teşrîna Peyêne Mesrur Berzanî û tewr peynî 17ê aşma Kanûne de Mustafa El-Kazimî hameyê Anqara.

Gelo Anqara de ser veraroja ma çi yeno qalîkerdiş? Kam çi qeraran ser azadîya kurd û Kurdistanî gêno. Heqê ma çinyo ke ma zî naveroka enê pêvînayîşan bizanê û goreyê enê ma zî qalî bikê. Heta enka yew derheqê navaroka enê pêvînayîşan raya pêroyin rê eşkerayî nêdayo.

Ez wazena eno hewte ser enê mijaran vindera.

Ziyaretê Kazimî medyaya Tirkîya de wêş ca nêgirew. Sedem zî yeno watiş ke Erdogan eno pêvînayîşan de nêresayo armancê xo.

Onca zî yew dîmen kewt tora cîvakî ser û ma pey hesîyayî ke Anqara semedê razî kerdina Mustafa El-Kazimî yew mesref ra texsîr nêkerda. Saz û muzîk, keyf û weşî…

Polo binra zî memleketî de bi mîlyonan mêrdimê feqîr, veyşan û teyşan estê…

Mi cor de va; mijara ma ena xal nîya. Mijara ma; bazarîya ser veraroja kurdan a.

Pêvînayîşê Berzanî ra pey peymana Şengalî terafê Hewlêr û Begda ra ameybî îmza kerdiş. Goreyê peymanî, wazêno Şengal bêpawitiş bimano û şarê ma yê Êzidî bêstatu bimano. Coka eno peyman terafê şarê Şengalî ra bi namêyê peymanê îxanetê ameybî qebûl kerdiş û şarê Êzidî eno peyman protesto kerdibî û hema zî bi çalakî û protesto berdewam kenê.

Şîyayîşê Berzanî yê Anqara semedê şarê Şengalî bî talukaya zaf pîli û şarê Şengalî enka mecbur mendo derdê hêrîşê DAIŞî yew ca de verdo û semedê statuya xo verva Hewlêr, Begda û Anqara tekoşîn bikero…

Zîyaret hame hedefgirewtiş

Pêvînayîşê Erdogan û Kazimî de yeno famkerdiş ke mijara yewin kurd û Kurdistan bi. Nê tenê kurdê Bakûrê Kurdistanî, statuya kurdê Rojava heta ke şênê vacê statuya kurdê Başûrê Kurdistanî zî bîya mijar.

Çiyo ke referandumê xoserîya Kurdistanî ke 2017 de ameybî viraştiş, tekilîya hukûmatê Başûrê Kurdistan û Iraqî zî herimnay bi, labelê tekilîya Tirkîya û Iraqî newera ganî bibî. Coka yeno famkerdiş ke pirsgirekê Başûrê Kurdistanî û Iraqî zî amey qesîkerdiş û dewleta Tirkîya wazena bi eno zayifîya Begda û Hewlêrî kar bîyara. Çiko mesele Begda û Hewlêrî referandum ra pey hama zî safî nêbîya. Begda butçe ra heqê Hewlêrî nêdena, Hewlêr zî bê îznê Begda Petrol roşeno. Eno rewşe ra Anqara zî feyda geyrena û wazena ser Hewlêr û Begda zextê xo xişin bikera.

Anqara çi wazena?

Bersiva enê pirsî eşkere werte de yo. Anqara wazêna her parçê Kurdistanî de kurdan bêstatu verda û kura de tikî statuya kurdan esta, ewca zî biherim na.

Ma rayna tadî ser zîyaretê Kazimî. Heta ke Walîyê Duhokî Elî Teter bahs nêkerbî, haya yewî navarokê eno pêvînayîşî ra zaf çinî bî. Walîyê Duhokî zî mîyanê heyetê Kazimî de bî û ci reyde şîbî Anqara û Qesra Erdoganî de bikeyf û weşî îxanetê kurdan mîyan de cayê xo girewtî bî.

Elî Teter 19ê aşma Kanune de tewrê yew qenalê Televîzyonî bî û yew reyêk de fekê xo ra vet û va: “Tirkîya; Hewlêr û Begda ra waşt ke peymanê Şengalî tede yew peymano newe semedê Mexmûrî zî bêro amadekerdiş.” Elî Teter bi eno îtirafê xo eşkere kerd ke peynîya peymanê Şengalî de zî Anqara esta.

Yeno famkerdiş Anqara reyna bi zayifîya kurdan û bêgiretîya Begda semedê xo karana û wazena penabêrê Mexmûrî ke serra 1993î ra heya enka warê xo ra verva zilmê dewleta tirkî koç bîyî, penaber bi reyna wêran bikera û çolanê Iraqî de perîşan bikera.

Seke mi va; kam kurara bêro Anqara mijare yewin qetilkerdişê kurdan beno, ameyîşê Kazimî reyde zî ana haseno ke penaberê Mexmûrî bibê qurban.

Çîyo ke zerra mi dejnena kayê Anqara û Begda nîyê. Şêrikbîyayîşê Hewlêr yan zî kayê Hewlêrî bî. Ez îdarekedoxê Hewlêrî ra tena yew qal vana; Fek eno sîyasetî ra verdî, ewro Anqara û Begda verva kurdan şima kar ana û meyşti tadêna şima ser. Xo rê aqil bê…