Polîsanê tirkan eşt hîrê taxanê qezaya Bismilî yê Amedî ser. Roniştoxanê taxan rê îşkence ame kerdene û keyeyî ameyî serûbinkerdene
Goreyê xebera Ajansê Mezopotamya (MA) 6ê nîsane de polîsanê tirkan eşt taxanê Dîcle, Dumlupinar û Hacîyê Kurdan ê qezaya Bismilî yê Amedî ser. Polîsan saete 02.00 de eşt taxan ser û heta 08.00 dewam kerd. Hetê bînî ra polîsan seba kenayîşê taxan makîneyî zî tede ardî. Kerdişê polîsan taxanê Dumlupinar û Hacîyê Kurdan de dibare bîyî.
Dîya zanayene ke polîsan Îbrahîm Halîl Ercanî û wayîrê keyeyo ke Ercan tede meyman bi rê îşkence kerd. Polîsan Ercan berd taxa Dîcle û reyna tira îşkence kerd. Polîsan çimê Ercanî girewtî, da piro û poşet sereyê ci rê kerd.
Ercanî îfade kerd ke wextê sereştişî de ê keye de nêbîyî û polîsan îdîa kerd ke keyeyê ci de muhîmat esto. Ercanî vat: ”Polîsan mi rê gef wend, vat ‘Eke ti nînan nêgêre xo ser ma do to bikişê.’ ”Wextê cigêrayîşî de Ercan ame destbendkerdene û ame berdene bi Mudirîya Asayîşî ya Amedî. Wextê nezaretî yê Ercanî ame dergkerdene.
Ercanî avûkatê xo rê vat ke polîsan bi saetan ci rê îşkence kerdo. Avûkatan gerreyê îşkenceyî kerd. Ercan 12ê nîsane de do vejîyo verê mehkeme. AMED
