Rojnameya Heftane

Selahîyetdarî çira seba Dêrsimî bêveng manenî

Merkezê Xeberan

Wendekara Beşa Averberdişê Domanan ya Unîversîteya Munzurî Gulîstan Doku (21) 5ê çeleyî ra nata vindîbîyaye ya. Zaynal Abarok eslê xo de Rûsya ra yo û nameyê ci hedîse de vêreno werte de nêaseno. Abarokî Rûsya de bîyo pîl û bado ke dayîka ci polîsêk reyde zewijyaya Dêrsim de sey lajê polîsî ciwîyeno. Badê ke çalakî û aktîvîteyî zêdîyayî, walîtîya Dêrsimî seba 15 rojan bajar de heme aktîvîteyan qedexe kerde. Walîtîye îdîa kerde ke nêrazîbîyayîşê ke yenê mojnayene ‘Şar teşwîq kenê û dişmenîye kenê’. Embazê Dokuye zî vinîyayîşê Dokuye ra nata çalakîyan virazenî. Rektor Ubeyde Îpekî waşt ke wendekarî çalakîya xo biqednê. Labelê wexto ke wendakarî serebûtê Cem Tekînogluyî vist vîrî ‘wendekarê cinîyî yê unîversîteye tacîz kerdbi’ rektor kampus terikna. No zihnîyet vera 17 serran de 15 hezarî ra zêdêr cinîyî hetê kesanê tewr nêzdîyê înan ra ameyî kiştene û hema zî yenî kiştene. Çîyo balkêşin ra yew zî oyo ke Dêrsim de hedîseyê îstîsmarî virazîyayî û virazîyenî. Dêrsim de 5 aşmanê peyênan de 4 hedîseyê îstîsmarî qewimîyayî. Ame zanayene ke qezaya Pêrtagî ya Dêrsimî de xeylê domanê lajî yê 11 û 16 serrî raştê îstismarê cinsî ameyî. Qerarê nimitişî dîya tehqîqatî ser. Verê cû Cizre de, Çewlîg de û Mêrdînî de serebûtê îstîsmarî amebî meydan. La derheqê nê pêro serebûtan de qerarê bêteqîbîye ameye dayene. Çi tesadufo ke wexto ke cinî û domanî yenî mexdurkerdene qerarê nimitişî dîyeno dosyayanê kerdoxan ser, kerdox yenî nimitene, nînê eşkerakerdene û nînê cezakerdene. Na rewşe de hûmara hedîseyanê winasîyan zêdîyena. Sîtemo serdest paştî dano camêrdan. Reaksîyon û vengê xurtî nînê nawitene ke serdestî hêzê şarî ra bitersî û mecbur bimanî ke rayraberdişê welatî bibedilnî. Derheqê nê babete de çîyî yenê nimitene. 10 serranê peyênan de îstîsmarê vera domanan se ra 700 zêdêr bîyo. Merdim bawer nêkeno ke selahîyetdarî na rewşe nêvînenî.

Yanî çîyo ke ma wazenî vajî oyo ke heme hedîseyan de gişta camêrdo serdest û îqtîdarî esto. Zihnîyeto camêrd o serdest bi serran o dewre de yo. Mumkun nîyo ke nêkerdişanê ke vera cinî û domanan de yenî kerdene nêvînî, labelê hesabê înan de tena berjewendîyê şexsî esto. Coka ra çimanê xo padanî û goşanê xo gênî. Lal û koran kay kenî. Çimkî no hawa înan rê asan yeno û menfîetê înan netîce de esto. Helbet no şar do rojêk biteqîyo û hesabê nê çîyan biperso. Ganî komel hemverê nê hedîseyan de bibo yew veng. Hende serran de çîyo ke nêameyo sereyê cinî û domanan ser nêmendo. Bajarê kurdan çargoşe bi kamerayanê averşîyayeyan ameyî girewtene. Bi leşker, cendirme, polîs û tîmanê taybetan ameyî dagirkerdene. Senî beno ke wexto ke qala îstîsmar û cinîyêk yeno kerdene tu selahîyetdarêk ra vengêk nêvejîyeno û werde de nêasîyenî. Xeberanê ke ameyî weşênayene de vejîya werte ke serebûtê îstîsmarî yê Pêrtagî hetê çeteyêkî ra serra 2004î ra nata dewam keno û kargeho ke dîmenê îstîsmarê domanan amebî antene hetê polîsan, leşkeran û notiran ra tim ameyêne zîyaretkerdene. Aqilê merdiman nênakokîyan nêtepişeno ke cayêko winasî de hedîseyê îstîsmar û vindîbîyayîşî nêrî vînayene û nêrî zanayene. Qey merdim cayo ke zîyaret keno nêzano? Nê çîyî polîtîk î. Tewr peynî Dêrsim de vejîya werte ke hirê çawişê pisporî tecawizê cinîyêka 20 serrî kerdî. Seba nimitişê serebûtî destûr nêdîyeno ke nêweşxane de kesêk cinî zîyaret bikero. Aqûbetê cinîye nîno zanayene. Îqtîdaro serdest û camêrdo serdest yewbînan ra hêz gênî, yewbînan pawenî  û yewbînan ceza nêkenî. Coka ra hserebûtî zêdîyenî.