Rojnameya Heftane

Sînorê şîdetî nêmendo

Valêre

Nê rojanê xeylê zor û zehmetinan ke ma tede vîyarenî de her hetî ra û her tewir şîdet virazîyeno. Prosesê vîrusî hetê her şexsîyet û organîzasyono ke meîlê înan yê şîdetî esto ra sey firsend yeno vînayene û kerdenanê xo bi asanî dekenî dewre. Merdimîye cayo ke nê rojanê zor û zehmetinan de biba yew veng de bîya lete lete. Qanûno ke vîrus de seba hepsîyanê edlîyan vejîya, zîndanan vend kerd û herinda înan de bi kesê ke tu qebehetê înan çin o ameyî dekerdene. No zî tewirêkê şîdetî yo. Şîdet tena kuwayîş nîyo. Reyna tewr zêde rojnamegerî ameyî tepiştene û taybet zî rojnamegerê cinî yenî girewtene. Êdî kutikan verdenî cinîyan ser û bedenê înan bi kutikan lete lete kenî. Êdî şîdet sînoran nas nêkeno û sînorê şîdetî nêmendo.

Sewbîna zîndanê Tirkîya nika bi doman û cinîyan dekerde yî. Edlî serbest ameyî veradayene û cinî-doman yenî tepiştene. Eylem Oyunlu tewrê domana xo ya 2 serrî û domana xo ra 10 rojî erzîya zîndan. Zanist de zî yeno vatene ke ganî cinîya vîyaye heta 40 rojî baldar biba. Reyna vatişêk verênan yê kurdan esto; vano ‘Mezelê cinîya vîyaye heta 40 rojî akerde yo’. Cinî heta aye wext her tewir nêweşî rê akerde ya. Coka ganî zaf baldar têbigêra û ganî werdê aye cinî cîya biba. La ma înan kamî rê vajî? Her çî hetêk de wijdanê merdimî daxî nêtepişeno ke merdim domana 10 rojî dekera zîndan. Eylem ra dima reyna Mêrdîn de cinîyêk tewrê domana xo erzîya zîndan. Nê wirdî cinî tena nimuneyê rojanê peyênan î. Homa zano çiqas cinîyê ke na rewşe de yî estî.

Wexto ke ez nê cinîyan vînane ya zî eşnawena filmêk kehen ê tirkan ê bi nameyê ‘Uçurtmayı Vurmasınlar’ yeno mi vîr ke reya verêne mi domanîya xo de temaşe kerdbî. La ez zana ke rewşa cinîyê kurdî ke zîndanan de yî zî hîna xirab a. Çimkî wexto ke kurd yeno vatene muameleyêko cîya keweno kewre. Seke mi cor de zî nuşt bî merdiman ser de veradayîşê kutikî.

Dîmenê domano ke taxa rezan de polîsêk kiştbî û bado ke ameybî tepişte çî ci rê ameybî kerdene vîrê merdimî ra nêşono. Wexto ke merdim nê çîyan dano têver merdim vîneno ke şîdet sînoran nas nêkeno û sînorê şîdetî nêmendo.

Wexto ke hêz keweno destê merdimî merdim şaş beno nêzano se bikero. Qezaya Qubînî ya Êlihî de domana bi nameyê Î.P.ya 17 serrî raştê tecawizê çawişo pispor M.O.yî ameye û waşte ke xo bikişa. Dêrsim de 3 polîs û meleyêk heqaret bi cinîyan kerdî û dîmenê ê gaman serê medyaya komelkî de pare kerdî. Çewlîg de xokiştişê cinî-domanan û Agirî de îstismarkerdişê domanan. Nê pêro çîyî tewirê şîdetî yê û bi destê îqtîdarî yenî kerdene. Yanî merkezê nê heme xirabîyan yew o. Awankar û rayberdişê înan zî yew o. Eke kerdox biameyêne cezakerdene ya zî tepiştene do nê hedîseyî hende nêzêdîyayêne. La tîya de herinda cezakerdişî de nê kesî serbest yenî veradayene û merdimîye înan vera tehluke de ya.