Rojnameya Heftane

Vayê Biden ê Amerîka do kêy bireso Kurdistan?

Mahîr Uzmez

3ê Teşrîna Peyêne de weçînitişê Amerîka hamey viraştiş. Goreyê netîceyê nêfermî Joe Biden 290 hebî delegan reyde weçînitişê 2020an de bî serekê Amerîka yî. 4 serrî yê vernîya ma de Biden û cîgera xo Kamala Harrîs Amerîka do îdare bikerê.

Eno netîce suprîz nêbî. Xora verê weçînitişî zî hema hema hemekes paweyê eno netîce bî.

Hem şarê Amerîka hem zî şarê dinya polîtîkaya Trumpî reyde ande eciz bîbî ke şîyayişê cê semedê şaran yew vayo erenî estirna, labelê eno wa semedê taynan zî bî sedemê bêhoynî.

Trump bi sîyasetê xo Rojhilato Mîyanî kerd sey cehenim. Yew cayra vernîya dagirkerîya erdanê Rojavanî akerd, cayo binra zî destek da dişminê şaran.

Ma sîyasetê Trumpî taybetî ê verva şarê Kurdî nizdîra şinasne nê. Trump sey yew çerçî, kura de menfeatê ci bî (taybetî menfeatî şexsî) xo antînêne ay kinar. Eno sîyasetê ci bî sedemî Serêkanî yê, Grê Sipî heta bi sedemê Efrînê zî…

Trump tena rayirê dagirkerdişê nê sukan nêakerd. Destekdayişê sîyasetê AKP-MHPyî tena Rojava yê Kurdistan nê, Başûr û Bakûrê Kurdistanî û heme muxalefetê Tirkîya bênefes verda.

Verva çimanê dinya de rejimê Erdoganî bi ardimîya Trumpî resa eno rojan. Kala temam kê Trump ra wanê… Coka ez nê wazena vêşî derg bika, şîyayişê Trumpî semedê ma Kurdan yew karo xeyrin o.

Hameyişê Bidenî taybetî ma Kurdan rê çi bîyaro?

Enka mijara ma ya sereke ena ya. Trump şî, ma yew nefeso rehet girot la enkara pey do se bibo?

Cewabê eno pirsî kampanyaya Biden ê limita de yo.

Biden yew sîyasetmedaro xurt o. Emrê ci mîyanê sîyaset taybetî zî sîyasetê teber yê Amerîka de viyarto. Hem pirsgirêka Tirkîya, hem pirsgirêka Kurd û hem zî temamîya Rojhilatî rind şinasneno.

Kampanya Weçînitişî de Biden eşkera Erdoganî ra vat bî “Ti Otokrat î” û dewamîya qalanê xo de va ‘Lazimo ma verva Erdoganî muxalefetê Tirkîya destek bikê û vernîya sîyasetê Kurdan zî akerê…’ Reyna Biden wextê kampanyaya weçînitişî de soz da û va ‘Hem mesela qatliyamê Armenîyan bişinasno hem zî mesela behra sipî û hem zî mesela s-400 yan hal bike.’

Enka şarê Kurd û muxafeletê Tirkîya paweyê Biden ê ke Biden binê enê qalan deko û vatişê xo pratikt de kar bîyaro. Biden wazeno eno sozê xo ca bîyoro yan zî ca nêaro, rayna zî çand tenî estî ke enkera bê hewn mendî.

Seke şima zî nizdîra zanê, tayn dewayê dewleta tirkî mehkemê Amerîka de sira xo pawenê. Dewayê sey “Halk Bank”, dewaya sey petrolê DAIŞî…

Trump verva Tirkîya enê dewayan kerdbî mijara tîcarî. Coka rayirdoxê dewleta tirkî wextê Trumpî de rehet bî.

Coka hameyişê Bidenî hewnê tayn kesan herimneno. Ay kesê ke hewnê înan herimîyayo ra yew zî James Jeffry û yewna bin zî Berrat Albayrak o.

Eno herimîyayişê hewn verê serrê  James Jeffrey werd. Hema weçînitiş tam nêqedîyabî Jeffry îstifa kerd. Jeffry terafê Trump ra Sûrîya de hameybî wezîfekerdiş. Wextê Jeffry de Sûrîye de taybetî bi destê çetayan qatlîyam, dest dergkerdiş, tecawuz, remnayîşê cenî û gedeyan zaf vêşî bibî. Eno sucê giran Jeffry bê Trumpî teyna serrê xo nêeşkayêne hewano. Coka rojêk eşkere bî ke Trump şono, Jeffry zî îstifa kerd.

Jeffry ra pey yew xebera îstifayî zî Anqara ra hamey. Wezîrê aborîya tirkî Berrat Albayrak îstifa kerd. Heya enka yew îstifakerdina Albayrakî eşkera bi weçînitişê Amerîka reyde gir nêdayo. Labelê sebebê eno îstifa zî eşkere bî ke hameyişê Biden re girêdayeyo.

Vernîya nuştoyê ma de bahsê dewayan û bahsê kirişnayîşê petrolê DAIŞî kerdibî. Yeno vatiş ke ekibê Bidenî peynîya enê meselan nêverdano. Coka Erdogan wazeno enkera bi enê tedbîran vernîya Biden bigîro.

Enê meselê û hema zaf meselê binî zî ana haseno, vayo ke Biden Amerîka estêrneno hamo dormarê Kurdistanî resayo. Hele ma boynî rojê vernîya ma de eno va do bibo tofan yan zî bibo wesar!