Walîtîya Dêrsimî bi bahaneyê janê Korona her menge de çalakî û aktîvîteyan newera qedexe kena. Şar vera nê qedexeyan nêrazîbîyayîş û reaksîyonanê xo mojneno. Derheqê babete de temsîlkaranê dezgehanê Dêrsimî qisey kerdî û waştî ke wa qedexe bêro wedaritene.
Hemserekê Partîya Demokratîke ya Şaran (HDP) yê Dêrsimî Îbarahîm Kasunî vist vîrî ke nêzdê yew serre yo ke Dêrsim de aktîvîte û çalakîyî qedexe yê û vat: ”No qerarê qedexeyî ke Walîtîya Dêrsimî girewto îqtîdarê faşîstî yê AKP-MHPyî ra xoser nêyo. Wazenê tîya vengê muxalefetê demokratîkî bibirnê û polîtîkayanê xo bîyarê ca. Seba ke vera nayî nêro vejîyayeye çalakîyan û aktîvîteyan qedexe kenê. Ma sey partîyanê sîyasîyan û dezgehanê komelê sîvîlî nê qedexeyan qebul nêkenê.”

Hemserekê Komeleya Elewîyê Demokratîke (DAD) Musa Kuluyî zî qiseykerdişê xo de vat: ”Îqtîdar welat açarnayo hepisxane. Heme dîn û kulturî ê bînan qedexe û înkar kerdî. Dêrsim pê bawerî, ziwan û kulturê xo cayêko xoser o. Coka her îdarekaro ke yeno tîya taybet o. Seba ke vengo muxalîfo ke tîya ra vejîyeno Tirkîya û dinya meeşnawê qedexeyan anê. No têna qedexeyê walîtîye nêyo. Walî pê nê qerarî hetê huqûqî ra sûc keno.”
Hemserekê Sendîkaya Kedkaranê Xizmetê Sosyal û Weşîye (SES) yê Dêrsimî Kahraman Yurukî zî qerarê qedexeyî sey qerarêkê keyfî name kerd û vat: ”Bi bahaneyê janê Korona wazenê vengê muxaleftî bibirnê. Jan têna çalakîyan de vila nêbeno, no qerar raşt nêyo. Walîtîya Dêrsimî ganî cade na xeletî ra agêra.”

Hemserekê Partîya Kede (EMEP) yê Dêrsimî Ergîn Tekîn zî vat: ”Hetêkî ra çalakî û aktîvîteyî yenê qedexekerdene hetê bînî ra îqtîdar kongre û mîtîngan keno. Eslê xo de pê nê qedexeyan wazenê vengê hetê muxalîfî bibernê.” DÊRSIM