Rojnameya Heftane

Xelaskirina pêşerojê û pûtepêdana paşerojê

Etîmolojîya peyva "dengbêj"ê ji hêla felsefeya zimannasîyê ve gelekî cîyawaz e: Deng + bêj, ne gotin+bêj. Di nivîsa xwe ya "Albûma Botan û Vejandina Dengan" de min hinekî li têkilîya deng û…

Gelo Kazimî jî bi derdê Qasim diçe?

Di dîroka nêz a Iraqê de navê General Ebdulkerîm Qasim xwedî cihekî girîng e. Piraniya pêkhateyên Iraqê jî bi erênî behsa Qasim dikin. Baş e di rastiyê de Ebdulkerîm Qasim kî ye?…

Vernî de merdimî xerepnayî…

Nesrîn Navdar

Kapîtalîst, emperyalîst û dagirkerî bê ke goşdarîya vengê xetereyan û nalîna xoza bikerê zirrnaya xo danê piro. Camêrdo ke Otêla Madimakî ya Sêwasî de bi benzîn însanî veşêna, ame efûkerdiş. Ganî kurdî verê ke bikoyê erey, yewîtîya xo awan bikerê

Wina eyseno ma çaxêke zehf xerab derbas kenê. Her ke şino teraza dinya ver bi xerabî şina. La merdim eşkeno vajo ke vernîya teraza dinya teraza merdimahî xerepya. Vernî de exlaq û wijdanê merdiman xerepya înan zî dima ra ekolojî û heme dinya xerepna. Sebebê nê awayî yê tewr pîlî zî kapîtalîst, emperyalîst û dagirker ê.

Hetêke de hêzê dagirker û mêtingerî bi dek û dolaban yan zî bi zordestîya xo rayîr ro dagirkerîya xo kenê a û hewl danê teberê ziwanê xo, kulturê xo, dînê xo heta teberê nîjadê xo de tu yewî û tu çîke sax nêverdê, bi neyartî nizdê şaran û erdnîgarîya şaranê ke bi zordarî ey bindest kerdê benê, ne wazenê erdnîgarîya înan pay ra verdê ne zî wazenê tarîxa înan saxlem verdê. Destêke înan de darî û torzîn daristanan kenê kor, destê înan ê bînî de girran tarîxe ma xera kenê yan zî kenê binê awe.

Çimê înan her tim talankerdiş, xerakerdiş û binawkerdişê erdnîgarîya Kurdan de yo û bi peymananê mîyanberê xo û netewe-dewletanê sey xo dagirkerîya xo mayînde û saxlemtir kenê. Heto bîn ra zî kapîtalîst û emperyalîstan didanê xo kerdê qirike erd û ezmanî û hewl danê heme çimeyanê erd û ezmanî rayîrê menfaetanê xo de biqedênê û xera bikerê

Kapîtalîst, emperyalîst û dagirkerî bê ke goşdarîya vengê xetereyan û nalîna xoza bikerê zirrnaya xo danê piro û merdimahî zî roj bi roj bena şahid an zî mexdûrê felaketêke rîerdî. Xerabîyayîşê pergalê ekolojî ke tedir bedelyayîşê awhewa û germbîyayîşê kûrewî yeno beno sebeb ke felaketê pîlî, erdlerzî û nêweşî û vîrûsê mergî virazyê. Bi veradayîşê gazê sera, metanî û karbonî ke zêde ra xebetnayîşê petrol û komiran ra beno vila ne tenê pergale ekolojî û dengeyê dinya, yê heme gerdûne keno xera.

3 ra 1ê herra rîerdî xerepyaya

Goreyê daneyanê Rêxistina Zad û Zîretî yê Neteweyê Yewbîyayeyan 3 ra 1ê herra rîerdî xerepyaya. Helbet semedo ke kapîtalîstî, senayîkar û zîretkarê menfaetperestî û emperyalîst û dagirkerê gunewerî yew û nîme xo ra nînê war erd û hêgayan jehrî de verdenê û serre bi serre no xerepnayîş zêdyeno û mexdûrê xerepyayîşê ekolojî zêdyenê. Bi eynî awayî serre bi serre mexdûrê şerranê emperyalîst û dagirkeran zî zêdyenê. Dagirkerê ke bi neyratîyêka sînornenase erdnîgarîya şaranê bînan talan kenê, bi eynî awayî hêrîşkarîya ziwan, kultur, bawerî û cuwîyînê şaranê bînan zî kenê. Yanê bi qaso ke neyarê xoza yê endeyke zî neyarê şarê bînan ê, neyarê ziwanan, bawerîyan û çandanê bînan ê.

Kapîtalîstî zî mêrdan ra pêk yenê

Eke bala merdimî banco nê heme dagirker, emperyalîst û kapîtalîstî zî mêrdan ra pêk yenê. Nê mêrdeyê ke zerar danê ekolojî ro bi eynî awayî verê xo dayo cinîyan zî. Kapîtalîstanê ke cinî bazarê xo de sey meta xebetnayî, emperyalîstanê ke cinî bêerk verdayî û dagirkeranê ke cinî bê war, bê ziwan û bê gan verdayî eynî hişmendî ra yenê; zîhîyetê pederşahî û mêrdey serdest î, heta estanê înan de kar kerdo. Tirkiye de zî her tim serdestî ro cinîyan amîya kerdiş. La bi taybetî bi desthilatîya AKPyî dir cinî zehf zêde û bi heme awayî ra ameyî îstîsmarkerdişî. Mêrdeyanê ke bêcezamendiş û efûkerdişanê hetê daraza ke girêdayê desthilatî ya ra efterayîş girot roj bi roj teda û tundîya xo cinî ser de zêdna û nê efterayîşê înan ey heta qirqerdişîya         cinîyan berd.

Tena aşma çileyî de 27 cinî ameyî kiştiş

Roja ke cinî nêrê kiştiş yan birîndarkerdiş çinî ya. Tena aşma çileyî de 27 cinî ameyî kiştiş û mergê hewt heban zî bişik o. Sey her gamî rayedarê desthilatî ancî razî û bêveng ê. Qic tera cêke sey Dêrsimî de ke ko û gêlî, kuçe û kolanê aye bi qamerayan xemelnayeyê wendekarêke bi nameyê Gulîstan Doku raste ra bena vinî û dewlete bi heme rayedaranê xo ya veng nêana xo.

Otêla Madimakî ya Sêwasî

Ancî serekkomarê na dewlete eşkeno bi wijdanêke rehet pênûse bigîro xo dest û Mêrikêke ke Otêla Madimakî ya Sêwasî de bi benzîn însanî veşênayê, bîyo sebebê qetilkerdişê tûtêke 12 serrî ra bigî heta extiyarêke 67 serrî efû bikero. La nêwazeno cinîyêka nêweş e, wayîrê di hebî ewladanê astengdaran ke tu sûcêke aye çinê yo serbest bido verradayîşî. Rastîyêka desthilatê dagirkeran ê pederşahan; serbestveradayîşê sûcdaran û hepiskerdişê bêsûcan o.

33 însanan qetil kerd; ame efûkerdiş

Ahmet Tûran Kiliço ke di qetilkerdişê 33 însanan de ca giroto ame efûkerdişî û bi efûkerdişê ey agirê Madimakî ame gurkerdişî û paştî deya faşîstanê ke dimayê seydvanîya merdimahî yê. Elîf Kisaya 70 serrî ke wayîrê di hebî ewladanê astengdaran a tenê semedo ke partîyêka siyasî ya legal e de qeydkerdî ya amîya hepiskerdişî. Bi eynî awayî bi desan nêweş û extîyarê cinî û mêrdeyî tenê semedo ke nîjadê înan, ziwanê înan û kulturê înan desthilatê dagirkeran ra cîya yo hepisxanan de yenê pêgirotişî. Desthilatê dagirkerî erdnîgarîya ma ra bigîrê heta însananê ma rê bi heme awayî neyartîya xo domnenê, qirkerdişanê xo domnenê, bi neyartîya xo ya şarê Kurdî rê sînoran derbas kenê û hemverê nê kerdişanê înan ma heta nê çaxî zî yewîtîya neteweyî ra bêpar mendê!

Sebebo yewin bêtefaqîya ma ya

Her çiqas nê aşmê peyînan de yewîtîya neteweyî ser tay gamî ameyê eştişî zî hema raste de rewşêka ke zerra şarê Kurdî bifîno ca nêaysena. Heta şarê ma yewîtîya xo ya neteweyî nêvirazo go emperyalîst û dagirkerî welatê ma gorey zerra xo ra jobînan rê pêşkêş bikerê. Eke eyro Bakur de ziwanê ma yeno qedexekerdişî, îradeyê ma yeno xespkerdişî, erdnîgarîya ma yena wêrankerdişî sebebê ey o yewin bêtefaqîya ma ya. Eke Rojawan de Efrîn, Serêkanîyê û Girê Spî kono destê dagirkeran, eke dewletê emperyalîst î bi eşkera paştî danê nê dagirkeran, sebebê ey bêtefaqîya ma ya.

Yewîtîya xo awan bikerê…

Tarîxê çarparçekerdişê welatê ma Kurdan ra heta roja eyroyî herçar dagirkerê ke welatê ma dagir kerdî û emperyalîst î û her tim hemverê Kurdan de bîyê yew.

La Kurdan çiray nêvato hela ma zî rayêke hemverê nê dagiker û emperyalîstan bibê yew î! Hewce nêkeno ke Kurdî heme yew îdeolojî yan zî yew bawerî pê bigîrê. Kam partî yan zî kam sazî û dezgeyî wayîrê çi îdeolojî yan zî çi bawerî benê wa bibê mecbûr ê ke ewro roj bê ke bikoyê erey yewîtîya xo awan bikerê.

Yewîtîya ma serkewtişê ma ya

A ya ke herçar parçeyan biersno pê û azadîya ma temîn bikero go yewîtîya ma bo. Yewîtîya ma serkewtişê ma ya hemverê dagirkeran a, yewîtîya ma azadîya welatê ma ya. Wexta ma bi awankerdişê yewîtîya xo risayî azadîya xo ma eşkenê bi têkoşîna xo heme şaranê Rojhelato Mîyanênî rê zî bibê mîsal. Yewîtîya şarê Kurdî yewîtîya heme Rojhelato Mîyanênî, yewîtîya Rojhelato Mîyanênî zî yewîtîya heme şaranê dinya wa hemverê kapîtalîst, emperyalîst û dagirkeran. Hemverê dagirkeranê ke welatanê şarî talan û dagir kenê û hemverê kapîtalîst emperyalîstanê ke xoza û ekolojî birîndar û xera kenê zî têkoşînêka hempar e lazim a.

Heta heme Kurdî dagîrkeran ra nêvajê nê, heta heme şarê Rojhelato Mîyanênî desthilatan ra nêvajê nê û heta heme şarê dinya emperyalîst û kapîtalîstan ra nêvajê nê go şerrî, tofanî û felaketî wina bidomyê.