Rojnameya Heftane

Wa Gulîstane nêra vîrîkerdene

Merkezê Xeberan

Wendekara Perwerdeyê Domanan ya Unîversîteya Munzurî Gulîstan Dokuya (21) ke Dêrsim de 5 çeleyî ra nata vînbîyaye ya ra hema zî xeberêk çin a. Ganî Dokuye nêra vîrîkerdene û bêra vîrfînayene. Xebatanê vînayîşî de hema zî tu netîceyêk nêameyo girewtene û hewl dîyeno ke Dokuye bêra vîrîkerdene. Êdî medya daxî Dokuye vîrî kerda û derheqê aqûbetê Dokuye de xeberî zî nênî viraştene.

Babîyê manewî yê şikdar Zainal Abakarovî Şubeyê Asayîşî yo ke cipersayîş yeno kerdene de xebityeno. Cipersayîş de têna îxtîmalê xokiştişî yeno destgirewtene. Nê çîyî merdiman de şikê ‘Gelo vindîbîyayîşê Dokuye de gişta babîyê manewî esto ya nê’ virazeno. Qey hende wexto ke Dokuye nêameya vînayene? Dêrsim de gamê merdiman daxî yeno taqîpkedene, labelê çi tesadufo ke her çiqas ke her çar goşeyê Dêrsimî bi mobeseyan piştene bo zî cinîyêk nîna vînayene.

Wina asîyeno ke heta ke reaksîyonêko zêde nêro nîşandeyene do no hedîse nêro roşnkerdene. Ma na rewşe hedîse û qetlîyamanê verênan ra  baş zanî.

Sewbîna her hetî de bêvengîyêke virazîyaya û hewl dîyeno ke Dokuye bêra vîrîkerdene. Hedîseyanê winasîyan de madur yena vîrîkerdene û her çî goreyê şikin û kedoxan ravêreno. Vengdayîşê ma seba şar û medya oyo ke ganî bêveng nêmanî û hedîse bidî vîrfînayene. Çiqas bêvengî biba do hende îstismar, taciz, tecawiz û qetilkerdişê vera cinî û domanan bizêdîyî. Cografyayêka qedîm û xoverdayoxî de kerdişê winasî polîtîk î. Ganî vengê cinî û domanan bêro eşnawitene.