Rojnameya Heftane

Wa merg biqedîyo…

Nevîn Alkan

Endamê Grup Yorumî Hêlîn Bolek û Îbrahîm Gokçek pîya semedo ke deyîranê xo azad bivajî û konseran bidê, semedo ke tedaya dewlete ya vera hunerî biwedarîya kewtbî rojeyê mergî. Hunermendan ra Hêlîn Boleke roja 288ine ya rojeyê mergî de dinyaya xo bedilnaye û polîsan hêrişê merasîmê cenazeyî kerdbî. Îbrahîm Gokçek zî 7ê gulana 2020î de roja 323. ê rojeyê merdî de şehîd kewt. Gokçek Goristanê Halef Hoca yê qezaya Talasî ya Qeyserî de ame definkerdene û şewa eynî roje de nîjadperestan hewl dabî hêrişê gorê Gokçekî bikerî. Polîsan cenazaya Gokçekî Cemxaneyê Gazî de girewtbî binê ablûqa û xeylê kesan tepiştî. Eynî çîyî merasîmê definkerdişê Boleke de zî ameyî cuyayene û xeylê kesî ameybî tepiştene.

Badê şehadetê nê wirdî xoverdayoxê hunerî çi heyfo ke dewlete vera grube de vindetişê xo nêbedilna û reyna zî konseranê Grup Yorumî asteng kerd. Teda zilm, hêriş û swb. her çî dewam kerd. Xoverdayoxê winasî kêm yenî rîyê dinya. Ganî xoverdayîşê înan biameyêne dewamkerdene û talebê înan biameyêne qêrayene. Xora ê şîyî la çi destê kamî ra seba cuyayîşê înan nêamekerdene. Eke şar sey înan xover bidayêne û xoverdayîşêko gird biviraştêne do ewro Grup Yorume bieşkayêne hercayê Tirkîya de konseranê xo bida û deyîranê xo bivaja. Nê merdimî raştî zî çîyo ke xeylê kesî nêeşkenî cesaret bikerî vajî, pê ardî. Xoverdayîşê înan bî tarîx û efsane. Peyêna peyên canê xo zî seba şarê xo û azadîye feda kerdî.

Kêmanîyê ke şehadetê Bolek û Gokçekî ra dima virazîyayî wa ê Ebru Tîmtîke de dibare nêbî. Vizêr şand Avûkat Ebru Tîmtîka ke tewrê Avûkat Aytaç Unsalî pê waştişê hukmkerdişê edîlî rojeyê merdî de bî, roja 238. ya rojeyê mergî de şehîd bîye. Eke xoverdayîş tena serê milê çend kesan de bimano xora dewlete ê kesan çiman ra vejena û vengê ke bivejî zî birnena. Raştî zî wexto ke mi xebera Tîmtîke girewte ez zaf pê qehirîyawa. Nê merdimî seba şarê xo û azadîye canê xo feda kenî û mergêko dejin tercih kenî. Çîrê ê ke manenî xo tay nêkenî herinda înan û hertewir dejê înan fehm nêkenî. No bêhîssîye vera her roje canê ercîyaye yew bi yewe dest ra şonî.

Xebera şehadetê Ebruye de mektuba aye ame mi vîr. Ebru Tîmtîke zîndanî ra pê serrnameyê ‘Mi bêrîya Dêrsimî kerde’ mektubêk erşawitbî. Tîmtîke mektuba xo de wina vatbî: “Eke ez bêra veradayene, ez cade şona Dêrsim. Heta ke ez nêşora ewja, ez weş nêbena. ” Wa rayîrê to akerde bo Tîmtîke. Şo caûberan û koyanê azadan de sey mîlçikek bifire. Ma nêeşkayî to tîya de weş bikerî. Ma nêeşkayî na dinya de Hêlîn Bolek, Îbrahîm Gokçek û to bidî cuyayene. Ma nêeşkayî bibî layiqê xoverdayîşê şima û seba talebanê şima çi ma dest ra ame ma nêkerd.

Ma umud kenî ke abubetê nê kesan nêro serê Aytaç Unsalî û talebê înan bilez bêrî caardene ke êdî kesêk dest ra nêşêro/a. Ganî rayapêroyî seba caardişê taleban û cuyayîşê Unsalî werizo payan ser.