Derheqê dewaya babîyê Denîz Poyraze de Hemsereka Pêroyî ya ÎHDyî Eren Keskîne rê dewa ameye akerdene.

Denîz Poyraza ke bînaya HDPyî ya Îzmîrî de hetê faşîst Onur Gencerî ra amebî qetilkerdene, babîyê ci Abdullah Poyrazî derheqê babete de Ajansê Mezopotamya rê roportajêk dabî. Dima nê roportajî ra derheqê babî Poyrazî de bi îdîaya ‘propagandaya rêxistine’ dewa amebî akerdene. Hemsereka Pêroyî ya Komeleya Heqanê Merdiman (ÎHD) Eren Keskîne vera na dewa hesabê xo yê medyaya dîjîtale de nêrazîbîyayîşê xo mojnabî. Nê nêrazîbîyayîşî ra zî derheqê Erene Keskîn de dewa ameye akerdene.

Dozgero ke derheqê babî Poyrazî de tehqîqat dîyabî destpêkerdene, dima gerreyê vilakerdişê medyaya dîjîtale yê Eren Keskîne kerdbî. Gerreyî ser o îdîaname ame amadekerdene û derheqê Keskîne de dewa ameye akerdene.

Roniştişê dewa 23ê sibate de Mehkemeya Cezaya Girane ya Îzmîrî de do bêro kerdene. Îdîaname de Keskîne bi îdîayanê ‘heqaret û hedefmojnayîşî’ yena sucdarkerdene û seba aye cezaya zîndanî ya 3 mengan ra heta 5 serran yena waştene.

Keskîne derheqê dewa de hesabê xo yê medyaya dîjîtale de no mesaj da: “Vilakerdişê mi ra Mehkemeya Cezaya Girane reyna mi rê dewa akerda. Yew mehkemeya ke nêzanena dejê babîyêkê xemgînî rê hûrmet bikera.”