Dayîka tepişte Gulîstan Ala ke Zîndanê Bunyanî ya Kayserî de ya, Emine Ale ard ziwan ke ganî têkoşînê vera tecrîdî bêro xurtkerdene ke tecrîd bêro şiknayene.

Tepişteyanê sîyasîyan 27ê teşrîna peyêna 2023yî de bi waştişê “Abdullah Ocalanî rê azadîye, meseleya kurdan rê çareserîye” dest pê grevê vêşanîye kerdbî. Tepişteyan 4ê nîsana 2024î de çalakîya xo kirişte merhaleya bîne. Tepişteyî nêvejîyenê pêvînayîşanê keyeyan û telefonî û mehkemeyan boykot kenê. Merdimê tepişteyan zî badê Nobeta Edaletî her hewte çalakîya ‘Veng Bidê Azadîye’ kenê.

Çalakwanan ra yewe zî Gulîstane Ala ke bi muebedê giranî Zîndanê Bunyanî ya Kayserî de yena tepiştene. Dayîka ci Emine Ale ard ziwan ke a hîrê mengî yo kênaya xo ra xebere nêgena, di roşanan de nêşîya zîyaretê ci û nê vatî: “Ma zî pîya bi tepişteyan dest pê çalakîye kerde, la tewrbîyayîş zaf kêm bî. Hetanê bînan ra çewî paştî ma nêdaye. Çew wayîrê ma nêvejîya. Ma bi mengan o vengê domananê xo nêeşnawenê. Heta ê çalakîya xo nêqedînê ma nêeşkenê înan bivînê. Heta ke tecrîdê serê Rayberîye nêqedîyo, ê zî do xo tecrîd de bitepişê. Ma nê roşan de zî domanê xo nêdîyî, rîyê înan nêvînê. Ewro ez ameya mezela lajê xo ser, qet nêbo ez ey dir qisey kena, dejê xo biney kêm kena.

Ma do tim paştî bidê domananê xo. Domanê ma zaf kewenê vîrê ma la têkoşînê înan o gird her çî ra muhîm o. Têna waştişê ma oyo ke tecrîd wa bêro wedaritene û çalakîya tepişteyan bêro wayîrvejîyayene. Ma veng danê dayîkanê şehîdan, dayîkanê gerîlayan, dayîkanê tepişteyan; ma yewbînî têna meverdê. Ma wayîrê têkoşînê domananê xo bivejîyê. Rojanê dişemeyî verê zîndanan de çalakîya ma est a. Wa her kes bêro ûca tewrê çalakîye bibo. Tecrîd sûcê merdimî yo. Ganî heme şarê kurdî vera tecrîdî vengê xo berz bikero. Ganî ma nê tecrîdî bişiknê. Eke berê Îmraliyî bêrê akerdene berê aştîye zî benê a.”