Avûkat Hakan Bakirciogluyî ard ziwan ke nêame waştene ke cînayetê Hrant Dînkî pêro hetan ra bêro eşkerakerdene û ganî hîsgerîya komelkîye dormeyê dewaya cînayetî de dewam bikera.
Mudiro Pêroyî yê rojnameyê Agosî Hrant Dînk 15 serrî verî amebi qetilkerdene la hema zî cînayet nêame eşkerakerdene. Avûkatanê keyeyê Dînkî ra Hakan Bakirciogluyî dewaya cînayetî ANFyî rê ercnaye.
Hakan Bakirciogluyî da zanayene ke dewa de heta nika zafê vergumanî vera dîyayî û vat: “Derheqê tay mesuldaran de zî bira beratî dîyaye ke bi nê hawayî verê roşnîkerdişê cînayetî ame girewtene. Sey Engîn Dînç, Ercan Demîr, Muhîttîn Zenît, Reşat Altayî tay selahîyetdarê Asayîşê Trabzonî zî vera dîyayî. Ma îtîrazê ney kerd. Eke îtîraz qebul bibo ê do reyna muhakeme bibê.”
Bakirciogluyî vist vîrî ke Engîn Dînç dima qirkerdişê Dedeogullariyî de zî tay binpaykerdişî peygoş kerdî. Bakirciogluyî bale ante ser ke mehkeme wazena ke cînayetê Dînkî seke ‘giştê FETO-PYDyî tede esto’ bimojna û vat: “Alî Ozî cînayet zanayêne û yew eleqeyê ci bi FETOyî çinbi. Ganî na dewa de pêro verguman, şikdar û sûcdarî têkilîyanê xo yê rêxistinan ra azade bêrê muhakemekerdene. Reyna dîmenê saetanê cînayetî vînîbîyaye yê. Nê zî seba ke cînayet bêro mîyankerdene ameyî nimnayene.
Eke derheqê mesuldaranê cînayetî de 14 serran de yew îdîaname biameyêne kerdene nika muhakeme qedîyayêne. 2015 de yew îdîaname ame amadekerdene la heta nika xeylêk sûcdar û vergumanî vera dîyayî. Aseno ke nêame waştene ke her hetî ra cînayetê Dînkî bêro eşkerakerdene. Ma muracatê mehkemeya Îstînafî kerd. Eke netîce nêvejîya ma do muracatê Mehkemeya Heqanê Merdiman a Ewropa zî bikerê. Wexto ke no cînayet qewimîyabi hîsgerîyêka komelkîye vejîyabî werte. Ganî na hîsgerîye dormeyê dewaya cînayetî de dewam bikera.” STENBOL
