Hetkarê Hemserekîya HDPyî yê Komîsyonê Çapemenîye û Propaganda ra Berpirsîyar Tayyîp Temelî vat ke çareserîya raştikêne HDP û Îtîfaqê Kede û Azadîye ya û wina qisey kerd: “HDP heman wextî de partîya cinîyan a. Yanî HDP xetêka xurte paweno.”

Temelî da zanayene ke HDP projeyêko winasên o ke tede hêzê çepgîrî, sosyalîst, şorişgêr û demokratî yê Tirkîya cagênê. Ey wina vat: “HDP netîceya fikranê Birêz Ocalanî de ronîya. HDP nameyê partîya îtîfaqê tarîxî ser o aver şî. Prosesê çareserîye de heyetê ma Îmrali de Ocalan de pêvînayîş kerd. Vengdayîşê ey ser o Rojawan de şoriş ame kerdene. HDPyî mabênê Îmrali, Qendîl û Anqara de mabênkarîye kerde. HDP Mutabeqatê Dolmabahçe de zî bî. La Îdareyê Erdoganî şer, pêkewtiş û înkar tercih kerdî û pêro çîyê pozîtîfî rijnayî.

HDP vera hişmendîya tekperest, înkarker û nîjadperestî ya netewe-dewlete rolêkê sey panjehrî ano ca. Hêzê hegemonîkî xîret kenê ke projeyanê komelî bêîtîbar bikerê. Coka vera HDPyî hêrişê îdeolojîkî est ê. Vera nê hêrişan HDP perspektîfê xo ra paştî gêno. HDP bi zemînê raştîye vera hêrişan xo ver dano. Xoverdayîşê HDPyî ra AKP-MHP verê rijîyayîşî de yo. Çareserîya raştikêne HDP û Îtîfaqê Kede û Azadîye ya. HDP heman wextî de partîya cinîyan a. Yanî HDP xetêka xurte paweno.”

Temelî derheqê ablûqaya vera HDPyî de zî wina vat: “HDP hîrê serran o binê ablûqaya sîyasîye de yo. La her weçînayîş de HDP beno pîlêr û beno aktorêko sîyasî. Vera teda û zorbazîyanê îqtîdarî ma amadekarîyanê pîlan kenê. Îtîfaqê Kede û Demokrasî 6 partîyan ra yeno pê. Ma wayîrê ê îmkanan ê ke eşkenê bin her şertî de qederê Tirkîya dîyar bikerê û Xeta Hîrêyine pêro waran de û Meclîs de temsîl bikerê.”