DEDAŞî derheqê şewato ke qezaya Çinarî ya Amedî û qezaya Şemrexî ya Mêrdînî de vejîyabî eşkerayîyêka newe kerde û vat ke no şewat “şewatê xozanî” yo. Hetekê bînî ra Hetkarê Wezîrê Karanê Zerreyî Munîr Karaogluyî îfade kerd ke heta nika derheqê sebebê şewatî de tu tespîtêk nêame kerdene. Rixmê na eşkerayîye DEDAŞî hemwelatîyo ke vatbî ke şewat çîkê têlanê elektrîkî ra vila bî sucdar kerd.

DEDAŞî eşkerayîya xo de nê cumleyî xebitnayî: “Selahîyetdarê Dîcle Elektrîkî badê îdîayan şîyî herêma ke şewatî ra tesîrdar bîye û etudo teknîk û bidetay kerd. Netîceya etudî de merdimo bi nameyê Î.E. vîdeoyo ke medyaya sosyale de pare kerd de vatêne serê goristanî de xeta elektrîkî est a. Ma tespît kerd û dîmen pare kerd ke serê goristanî de xeta elektrîkî derbas nêbena. Peynîya tespîtî de avukatanê Dîcle Elektrîkî derheqê Î.Eyo ke dewa Koksalanî ya qezaya Çinarî ya Dîyarbakirî rê qeydkerde yo û şarî rê zanayîşê xeletî dano de îlanê sucî kerd.”