Parlamentera HDPyî Zuleyha Gulume ard ziwan ke cinîyî xeyman de xeylê zorîyan anjenê û wina vat: “Cinîyê ke bajarê xeyman de manenê, hetê camêrdan ra marûzê şîdet û tacîzî manenê. Gere bi lez û bez ewleyîya înan bêra peydakerdene.”
Gulume dîyar kerd ke problemê cinîyanê ke herêmanê erdlerzî ra yê zaf ê, problemê cinî û domanan wina rêze kerdî: ‘‘Goreyê zanayîşan ê ke ma dîyî û cinîyê mexdûrî goşdarî kerdî, problemê setargeh û ewleyî cayêkê tewr berzî de yê. Cinîyê ke bajarê xeyman de manenê, hetê camêrdan ra marûzê şîdet û tacîzî manenê. Gere bi lez û bez ewleyîya înan bêra peydakerdene. Problemê cinîyan o bîn zî pakîye û hîjyen o. Tay cayan ra tûwaletê seyarî sey tekel yenê xebitnayene. Tûwaletê cînîyan cay-cayan ra qet çin ê û tay cayan ra zî zaf kêmî yê. Hewcedarîya cinîyan bi ped, tampon û bincilî û hacetê weşîye yê seba cinîyan, est a. Û sewbîna werd û bezê domanan zî hewce yê.”
Xeymanê cinîyan awan kenê
Gulume dîyar kerd ke HDP do 8ê Adare de paştîdayîşî hîna xurt bikero û wina vat; ‘‘Ma hewl danê ke cinîyan reyde tora cinîyan awan bikerê. Ma xeymanê cinîyan awan kenê. Ma xeyman de sohbet kenê û hewl danê ke nê dejanê xo bi paştîdayîşî bipêşê. Ma xebitênê ke dewlete perpirsîyarîyanê xo bîyara bi ca. Ma do 8ê Adare de paştîdayîşî xurtêr bikerê.’’
