Girtî Seracettîn Yuksekbag (55) di sala 1993’yan de ji aliyê Dadgeha Ewlehiya Dewletê ya Amedê ve hat girtin û cezayê muebedê lê hat birîn. Li gorî biryara dadgehê diviya bû Yuksekbag piştî 30 sal girtî ma bihata berdan. Lê Desteya Çavdêrî û Îdarê ya Girtîgehê biryara dadgehê nas nekir û bi îdiaya “halê nebaş” berdana Yuksekbag 9 mehên din dirêj kir. Pêwist bû Yuksekbag di 29’ê Mijdara 2023’yan de bi şert bihata berdan. Lê 6 meh û 2 roj berdana wî hatibû taloqkirin. 6 mehên taloqkirî temam bû û dîsa berdana wî hat nirxandin. Desteya Çavdêriyê vê carê 9 meh û rojek din taloq kir û careke din biryara dadgehê binpê kir.
Yuksekbag niha li Girtîgeha Jimara 1’an a Tîpa T a Rihayê girtî ye. Desteya Îdare û Çavdêriyê ya girtîgehê bi hinceta cezayên disiplînê li Yuksekbag hatiye birîn berdana wî taloq kir.
Li gorî vê rewşê divê Yuksekbag di 25’ê Adara 2025’n de bê berdan.
