Seke zanîyeno Almanya de binê îqtîdarê Hîtlerî de vera kêmneteweyîyan polîtîkaya nîjadpereste ameye caardene. Bi taybetî yahudî û romanî raştê cîyakerîyêka kûre ameyî. Serranê Şerê Dinya yê II. de bi mîlyonan yahudî û romanî ameyî qirkerdene. Lîteratur de nameyê Jenosîdê Yahudîyan sey “holokost” yeno pênaskerdene. Jenosîdê Romanan zî sey “porajmos (çinkerdiş, rijnayîş)” zanîyeno. Hîtlero gemarin merd û peynîye de nê di çekuyî komelê Almanya rê “mêras” mendî. O dem almanan bi girseyan paştî dayêne “fuhrerî” rê, roman û yahudîyî bi îştah qir kerdî. Ewro qaso ke almanî nê tarîxê xo ra “şerm” kenê, bapîr û dapîranê xo şermezar kenê. Êdî fuhrer çimanê înan de bîyo “morder (qetilkar)”.
Tirkîya de namzetê hîtlerbîyayîşê na seserre Erdogan o. Her serre nê rayîrî de şono. Eke ewro destê ey de bêro vera kurdan “porajmos” dano kerdene. Rêxistinbîyayîşê kurdan ey tersneno û asteng keno. Sewbîna o wazeno sey Hîtlerî têbigêro. Heme tîranî “porajmosan” ra xo weyî kenê. Çike porajmos înan rê îqtîdar ber ano. Xora mabênê îdareyê Erdoganî û nîjadperestan (Partîya Vatanî, BBP, MHP, Partîya Zaferî ûsn.) de nika hemkarîye est a. Ey sîyaseto etnîkî dayo destanê nê “cergan”. Ci rê vato ke “ez her tewr bêrayîrîye û dizdîye bikerî, şima dest menê mi ra, ez zî kurdan teslîmê şima kena. Pêro hêzê dewlete vera şarê kurdî bişuxilnê. Her tewr nîjadperestîye û dişmenîye bikerê, hukm do şima asteng mekero.”
Mugla de hêriş
Cergê Erdoganî her şaristanê Tirkîya de vera kurdan dişmenîye raminê. Seke sebebê xizanîye, krîzê ekonomîkî, bêrayîrîye, dizdîye û bêedaletîye kurd ê. Çiqas ke hukmatê Erdoganî kede weno, hende vera kurdan şîdet şuxilîyeno. Çend hewteyê verî Mugla de qezaya Seydîkemerî de 4 karkerê mêrdînijî raştê hêrişê 25-30 faşîstan ameyî. Hêriş de baxusus kardî, terrik û çekî xebitîyayî. Muxtarê taxa Kumluova Hîlmî Denîz zî beşdarê hêrişî bî. Nê tewr hêrişî bêguman newî nîyî. Her serre merdim nê serebûtan reyde yeno têrî. Kurdî hem yenê xizankerdene hem zî raştê nîjadperestîye yenê.
Kayserî de nîjadperestîye
Têna kurdan nê multecîyanê sûrîyeyijan ser o zî teda est a. Ê partîyê ke bi Erdoganî hemkarîye kenê, her roje medyaya sosyale û çapemenîye de vera multecîyan ziwanê qilêrinî gurênenê. Mîyanê tirkan de hişmendane “ksenofobî (vera xerîban dişmenîye)” afernenê. Netîce de nîjadperestî hêrişê sûrîyeyijan kenê. Mîsal çend rojî verî qezaya Melîkgazî ya Kayserî de camêrdêkî domanêko 7 serrî herimnabî. Dima ra nîjadperestan no serebût sey bahane ramojna, hêrişê dikananê sûrîyeyijan kerd û tayênî vêşnayî. Serebûtan de bi taybetî eşkerayîyê Mudirê Asayîşê Şaristanî Atanur Aydinî “fîyasko” bîyî. Ey wina vatbî: “Şima reaksîyonê xo nîşan da. Ma şima fam kerdî û peyama şima girewte. Tîya de mexdur tirk nîyo.” Yanî mudiro xeripîyaye vano ke eke kes tirk nîyo, wa eşkeno bêro herimnayene. Ferasetêko kêmkewte yo!
Antalya de ciwanêk kişîya
Dima ra hêrişî bajaranê bînan de vila bîyî. Antalya de zî sûrîyeyijî raştê teda ameyî. Ciwanêko 17 serrî yo bi nameyê Ahmed Handan El Naîf qezaya Serîkî ya Antalya de bi destê nîjadperestan kişîya. Gama ke karkero multecî El Naîf cehde de gêrayêne, 3 mordemî motosîkletî ra ameyî war û vernîya ey birnaye. Nîjadperestan ra yewî El Naîf uca de kardî kerd û kişt.
Merdim vergê merdimî yo
Heme nê nimuneyî nîşanê rejîmê Erdoganî yê. Komelî de yewbînî rê bacîye est a, qetî “tehemul” çin o. Pergalê dizdî şar yewbînî rê kerdo dişmen. Senî ke Thomas Hobbesî vatêne “merdim vergê/a merdimî yo/a.” Netewe-dewleta kanwaze wazena ke wa pêro komel mîyanê alozîye de biciwîyo. Armancê na dewlete merdimî keyfweşkerdiş nîyo.
Eksê ci “mirozinkerdiş” o. Çiqas ke komel ver keweno, hende tîranîye estbîyayîşê xo domnena. Tîran şarî ra hertim “tîranofîlîye” paweno. Tirkîya de zî xora nika tîranîye est a. Nameyê ci “Komara Tirkîya” yo, la îdareyê ci demokratîk nîyo. Dewleta Gokturkan de bîla “kagan” qasê Erdoganî wayîrê selahîyetî nêbî.
