Evîn Guneşe (Fatma Demîrel) Amed de xo kiştbi. Amebi parekerdene ke seba ke Evîne pê Qerarnameyê Hukmê Qanûnî (KHK) ra karî ra ameya vetene û nêeşkena karêkê bînî bivîna xo kişto.

La dima medyaya dîjîtale ser o mesaj û vilakerdişê Evîne Guneş eşkera bîyî. Rojnamegere Rozarîn Urucu îfade kerd ke Evîne xokiştişî ra verî ci rê qeydê vengî şawitbi û qeydî de Evîne vatêne ke Mihemed Ronahî aye pê kiştişî tehdît keno, aye gerreyê Ronahîyî kerdo. Rozerîne Urucu da zanayene ke seba ke Evîn Guneş gerreyê xo apey girewt aye zî xebera nê gefan nêkerda.

Evîn Guneşe qeydê vengî de vatêne ke aye hewteyêkî verî zî xîret kerd ke xo bikişa, wedarîyaye servîsê ciewnîyayîşê giranî. Evîne vata: “Hînî ez daymîş nêbena.”

Evîne pare kerd ke tehdîtanê Ronahîyî ra dima aye gerreyê xo apey girewta û vat: “Ma ey de pê kerd. Ma taxa Ofîsî de cayêk de roniştî. Hetê ey de dezayê ci estbi, ey nameyê dezayê xo nêvat la twitter de nameyê dezayê ci ‘Parezer’ bi. Dezayê ci vat ke dewa înan dewa agayan a, yanî dewa qoricîyan a. Dezayê ci vat ‘Ap Salîhî bire dayo. Eke ti gerreyê xo apey nêgêrî o do to bikişo.’ Mi vat ‘Eke mi nêkişo bêşeref o.’ Ez hînî nêzanena ke se bikera.”

Evîn Guneşe çend serrî verî pê KHKyan karî ra amebî vetene û kênaya xo ya 16 serre H. reyde ciwîyayêne. Ame parekerdene ke Mihemed Ronahîyî kênaya Evîne H. zî tacîz kerdo. Evîne û kênaya ci H. pîya gerreyê Mihemed Ronahîyî kerdî. Reyna qeydêk de ame dîyene ke Mihemed Ronahîyî Evîne rê nêngê seksîstî çînayî.

Dima ke teda, gef û mobîngê Ronahîyî yê vera Evîne eşkera bîyî sere de cinîyan ê kurdan xeylêk kesan vera Mihemed Ronahîyî nêrazîbîyayîşê xo mojna. Rayaumûmîye wazena ke Mihemed Ronahî bêro tepiştene û muhakemekerdene.

Komeleya Cinîyan a Rosa zî derheqê babete de eşkerayîyêke daye û vat: “Evîne serrêke verî muracatê komeleya ma kerd û vat ke Mihemed Ronahî ci rê şîdet keno. Waştişê aye ser o ma na rewşe dezgehê ci rê îfşa kerde. La dima seba ke Evîne gerreyê xo apey girewt ma zî prosesê huqûqî qedîna. Ma sey komele na babete de mesuldarîya xo qebul kenê. Evîn Guneşe şîdetê dewlete û camêrdî ra neçare mende ke xo bikişa. Ma do seba ke mesuldarî cezaya xo bigêrê na babete teqîb bikerê.” AMED