Nûçegihana Ajansa Mezopotamyayê (MA) Esra Solîn Dal û Mehmet Aslan ku di 26’ê Nîsanê de hatin binçavkirin û girtin, ji girtîgehê derketin. Rojnameger Esra Solîn Dal ji Girtîgeha Jinan a Bakirkoyê derket.
Xizmên Esra Solîn Dalê, parêzerên wê û rojnamevanan Dalê li ber girtîgehê pêşwazî kirin. Dal gava ji girtîgehê derket, li vir kurteaxaftinek kir. Dalê bal kişand ser zextên li ser Çapemeniya Azad û got ku ji ber nûçeyên xwe yên der barê tecrîdê û jinan de hatiye girtin.
Solîn Dal diyar kir ku ew ê tim binivîsin ku li welêt tecrîd heye û got: “Çapemeniya Azad nayê bêdengkirin.”
Mehmet Aslan jî li Enqereyê ji aliyê hevalên xwe yên rojnameger û parêzeran ve hat pêşwazîkirin. Mehmet Aslan jî anî ziman ku ew dê nivîsandina xwe û karê rojnamegeriyê berdewam bikin.
