Serekê dewleta Rusya Putin vat ke înan rojhelatê Ukraynaye Donbasî de operasyonê leşkerî ê taybet dayê destpêkerdene.
Bado ke Rusya Dongassî de xoserîya di rayîrberîyanê xosere nas kerd, sibayê roje de herême de leşkerê Rusya dest bi operasyon kerdî. Serekê dewleta Rusya Vladimir Putin serê sibayî lez qiseykerdişê vengdayîşî ê netewî kerd. Putin vat ke Dongassî hetkarîya leşkerî wazeno û wina vat: “Aye gore mi qerar da ke operasyonê leşkerî ê taybet organîze bikera. Amacê operasyonî oyo ke kesê ke 8 serrî yo hetê rejîmê Kîevî ra raştê destdergkerdiş û qirkerdişî yenê, bêrî pawitiş. Ma do Ukrayna Nazîzm û mîlîtarîzmî bixelisnî.”
Putin da zanayene ke tu amacêko înan ê dagirkerdişê erdê Ukraynaye çinî yo û ma do tu çîyêk bi kesêk nêdî ferzkerdiş.
Wezîrê Karê Teberî ê Ukraynaye Dmytro Kuleba zî wina vat: “Putin vera Ukraynaye de şerêko gird da destpêkerdene. Hêrişê vera bajaranê aştîyane yê Ukrayna dewam kenê. Ukrayna do xo bipawa û ser bikewa. Dinya eşkena û ganî Putin bivindarna. Dem demê têgêrayîşî yo.”
Ame zanayene ke xeylê bajaranê Ukrayna, Paytext Kîev zî tede vengê teqayîşan yeno. Vîşêrê Kîevî bajarê sey Kharkov, Kramatorsk, Mariupol, Mykolaiv û Odessa ra tê dima vengê teqayîşan ameyî.
Derheqê leşkerê Rusî derbazê herêmanê xoseran bîyî yan nêbîyî de tu eşkerayî nêame dayîş.
