Piştî leşkerên di şerê li Herêma Federe ya Kurdistanê hatin kuştin, dewleta tirk careke din bajarên Bakur û Rojhilatê Sûriyeyê hedef girt. Di vê çarçoveyê de êrişî stasyonên petrolê, ceyran û avê yên bajarên Tirbêspiyê, Dêrik û Kobanê hedef girt. Herî dawî jî navendên Kobanê û Qamişlo bombebaran kir. Hevserokê Partiya Yekitiya Demokratîk (PYD) Salih Muslim got ku êrişên dewleta tirk ne cara ewil e tên kirin û da zanîn ku ev êriş 8 sal in bênavber didomin.
‘Em bi şerekî li dijî mirovahiyê re rû bi rû ne’
Muslim, diyar kir ku êrişên dewleta tirk nû nînin û wiha domand: “Tirkiye, li cihê DAIŞ’ê hiştibû berdewam dike. Her ku firsend dikevin destê wê asta êrişên xwe dijwartir dike. Li ku derê li dijî wan tiştekî neyînî çêbibe, berê xwe dide Bakur û Rojhilatê Sûriyeyê. Êrişên dawî jî di vê çarçoveyê de hatin kirin. Piştî tiştên li Başûr qewimîn, ji bo pêşiya bertekên li dijî wan bigirin, mîna ‘gurên birçî’ êrişan dikin.”
Di berdewamê de Muslim destnîşan kir ku di êrişan de qadên sivîlan hedef hatine girtin û wiha dirêjî da axaftina xwe: “Ev êriş, bandoreke neyînî li ser jiyana rojane dikin. Ji êrişan armanc dikin ku herêmê vala bikin. Yên ku bikarin bi çekên xwe bikujin dikujin û dixwazin yên din jî tî û birçî bihêlin û bikujin. Di vê çarçoveyê de em bi şerekî li dijî mirovahiyê re rû bi rû ne.”
‘Tevdîrên gel hene’
Bi domdarî Muslim daxuyand ku di encama êrişên dewleta tirk ên ji 4’ê cotmehê heta niha bi qasî 2 milyon û 150 hezar kes bêceyran mane û wiha pê de çû: “Di êrişên îro hatine kirin de cara 3’yemîn e binesazî hedef tê girtin. Di demên berê de jî tesîsên petrol û avê û nexweşxane hedef girtin. Dixwazin binesaziya Rêveberiya Xweser têk bibin. Dixwazin hêviya gel a jiyana nû têk bibin. Em di mehên zivistanê de ne. Tirkiye êriş dike û rejîma Sûriyeyê jî bi ambargoyê piştgiriyê dide. Gelên me yên ji Efrînê xwe spartin Şehbayê hedef digirin û hewl didin wan ji kampan derxînin. Gel jî li dijî van têdikoşe. Gel, li dijî hemû cureyên êrişan çareserî peyda kiriye û rêxistiniya xwe bihêztir dike. Gelê me jî li dijî êrişên Tirkiyeyê tevdîrên xwe girtiye.”
‘Bêdengî tê wateya erêkirinê’
Muslim, got ku êrişên li dijî Bakur û Rojhilatê Sûriyeyê bandorê li tevahiya xelkê herêmê dikin û axaftina xwe wiha qedand: “DAIŞ’ê êriş kir lê nekarî. Îcar dixwazin tiştên DAIŞ’ê nîvco hiştî temam bikin. Em nikarin bibêjin DAIŞ xelas bûye. Ev rast nîne. DAŞ hêj jî heye. Dema êrişên Tirkiyeyê zêde dibin, DAIŞ dîsa mezin dibe. Mezinbûna DAIŞ’ê ne tenê ji bo gelê Rojava, ji bo hemû cîhanê xetere ye. Ev êriş, ji bo pêşîlêgirtina têkoşîna HSD’ê ya li dijî DAIŞ’ê tên kirin. Ji bo DAIŞ xwe bihêz bike, bi van êrişan jê re dem tê dayîn. Divê hemû cîhan li dijî vê raber ser pêyan. Divê cîhan vê rastiyê bibîne. Bêdengî, tê wateya hevkariyê.”
Em ê heta dawiyê li ber xwe bidin
Em ê li dijî van êrişan li ber xwe bidin. Em il ber xwe didin û her roj şehîdên me çêdibin. Ji bo ku gelê kurd bi serfirazî û birûmet bijî, dê ev têkoşîn heta dawiyê bidome. Ji bilî berxwedanê tu rêyên me nînin. Gelên me ji leşkerên xwe bibawerin û li gel wan li ber xwe didin. Dê ev êriş tu carî negihijin armanca xwe.”
