Seba çareserîya meseleya kurdan merdimo tewr girîng bêşik Serekê PKKyî Abdullah Ocalan o. Armancê ey û rayîrhevalanê ci yo bingeyên weşhalîya şaranê Kurdistan û Tirkîya yo. Coka vera serdestan têkoşînê bêhempayî hema hema 50 serrî raver dest pêkerd. Ocalan xoverdayîşê xo 25 serrî yo girawa Îmrali de bi qerardarîye domneno. Şertê ey roje bi roje giranêr benê. 40 aşmî yo mîyanê îzolasyonêkê koyî de yo. Şaro kurd zano ke no îzolasyon têna vera ey nê, vera ci zî yeno caardene. Cergê ke dewleta tirke “îdare” kenê, wazenê şexsîyetê Ocalanî de pêlê azadîya kurdan bişiknê. Îzolasyon yan tecrîd coka ra ramîno.
Dewleta tirke bîlasebeb wina têgêrena. Êdî çêlike/çêlik hakê xo ra vejîyaye/vejîya. Merdim nêeşkeno na/nê çêlike/çêlikî yewna bîyaro mîyanê nê hakî dekero. No duştê dîyalektîkî de yo. Dewleta cergan yan ewro yan siba ganî îradeyê şarê kurdî bişinasno. Yan bi rayîrê aştîye yan bi rayîrê şerî. Kurdî vera her rayîrî amade yê. La cergî nêzanê se bikerê. Taloqkerdişê çareserîya meseleya kurdan taloqkerdişê aramîya şaranê Tirkîya û Kurdistanî yo. Eke cergî û paştîdayoxê înan nêwazenê kuçe û koyan de pêkewtiş bivînê, wa cade meseleya kurdan de bêrê têrî. Seba çareserîya na mesela merdimo tewr muhîm Serekê PKKyî Abdullah Ocalan o. Senî ke Afrîkaya Başûre de Nelson Mandelayî înîsîyatîf girewt destê xo û meseleya sîyayan çareser kerde, Ocalan zî heman pozîsyon de yo.
CPT gaman nêerzeno
Tirkîya nika polîtîkaya cîyakere dewam kena û çareserîya persa kurde rê nêzdî nêbena. Na çarçewa de Îmrali de tecrîdî giran kena. Çend rojî verî eşkera bî ke tecrîd 3 mengî ame dergkerdene. Vera na polîtîkaya tedakere dewletanê Rojawanî ra reaksîyonêko şênber nêno ramojnayene. Eksê ci paştî danê îdareyê Erdoganî yê despotîkî. Ma vajê çend rojî verî ANFyî bi CPTî roportajêk kerd. CPT persanê Serkan Demîrelî rê cewabanê şikdaran dano. Nameyê ci “Vergirewtişê Îşkenceyî” yo, la vera îşkenceyî mesuldarîya xo nêyano ca. CPT hetêk ra dîyar keno ke “heya tecrîd duştê heqanê merdiman û duştê huqûqê mîyannetewî yo”, hetekê bînî ra vera na bêhuqûqîye gaman nêerzeno.
CPT ‘kayê’ xo keno
CPT yew dezgeho selahîyetdar o ke şero Îmrali de şertan çimdarîye bikero. Yeno vatene ke CPTyî tewr peyên êlule 2022 de Îmrali zîyaret kerdo. Roportajê Demîrelî ra eşkera beno ke mîyanê nê prosesî de Îmrali ameyo zîyaretkerdene. Çike roportaj de vajîno ke Îmrali de vera tepişteyan destkarîya xirabe çin a. Eke CPT nê şertan zano, qey raporê xo bi rayapêroyîya kurdan pare nêkeno? Gelo nêzano ke Ocalan têna nîyo û peyê ey de bi mîlyonan kesî est ê? Gelo dewleta tirke eşkerakerdişê raporî asteng kena? Çira CPT hende vernîya hukmatê Erdoganî de vileyê xo çewt keno? Êdî Erdogan ne huqûq ne qanûn ne zî Yewîya Ewropa nas keno. CPT kamcî sînorê huqûqî ra behs keno? Hema zî dewleta mafya û cergan ra hêvîya xo est a? CPT wina aseno ke şarê kurdî reyde “kayê” xo keno.
