Rejîmê otokratîkî dişmenê her ganî yê. Seba înan têna ganê ke “erje” berhem anê, rûmetdar ê. Nê rejîman de “mammonîzm” est o. Di armancê nê rejîman est o, ê zî peserîya sermaye û pawitişê îqtîdarî yo. Seke Karl Marksî vatêne kapîtalîstî dara ke sîya ci pere nêkena birnenê. Çimanê rejîmanê kapîtalîst û totalîteryanan de zî her çî “parzunê” pereyan de yeno awguznayene.
Tirkîya de hem pergalo kapîtalîst hem zî otokrasî est o. Yew merdim yan zî yew tîranî her çî girewto binê serdestîya xo. No tîran wazeno bêşik pêro komelî “dîzayn” bikero. O wazeno ke wa her gan verê ey de zanîyanê xo rono. Gano ke xover dano seba ey “gefêk” o. Tîran xeyalê bîyayîşê Hadesî keno. Seke zanîyeno mîtolojîyê yunanan de homa Hades est o. No homa binê erdî de têna merdeyan îdare keno. Tîrano ke Tirkîya îdare keno zî wayîrê nê armancî yo. Xeyalê ey de têna merdeyî est ê. Merdimo tewr baş merdimo merde yo. Tîran plan keno ke Tirkîya goristanêk bibo û wa çew vera ey têkoşîn nêkero.
Her gan binê tehlukeyî de yo
Dewleta tirke de cuya her ganî binê tehlukeyî de ya. Cinîyî, domanî, heywanî, xoza, kurdî, elewîyî ûsn. pêro ganê bêpawitişî tîranîye heta asta peyêne hîs kenê. Mîsal her roje yew cinîye bi destê camêrdan kişîyena. Dewleta pederşahî hişmendane heqanê cinîyan nêpawena û tu tedbîrêkî nêgena. Yewna karkerê domanî yenê xebitnayene û tay domanî kar de kişîyenê. Xoza zî raştê hêrişanê neo-lîberalan yena. Tirkîya û Kurdistan de xeylêk cayan de projeyê madenkarîye û awbendan ramînê. Xoza bi destê kolonîzatoran xeripîyena. Awî, koyî, deştî yenê hacetkerdene. Tîran û plutokrasî xoza ra rant anê pêser. Kurdistan de xeylêk awbendî virazîyayî, tayê bajarê tarîxî binê awe de mendî. Tîya de têna rantîye çin a, “rijnayîşo kulturî û tarîxî” zî est o. Seke ma vat pêro ganê bêpawitişî raştê zulmî yenê. Înan ra di dînamîkî kurdî û elewî yê. Bi desan serrî yo kurdî û elewîyî raştê cîyakerîye yenê. Îqtîdar hertim înan sey dişmen hesibneno û huqûqê dişmenî ano ca. Kurdî û elewîyî xeylêk reyî ameyî qirkerdene. Her rey dewlete nê qetlîyamî yan nimitî yan zî qetilkarî pawitî. Ewro zî tîranîye de nêzdîbîyayîşêko winayên est o.
‘Mergo bixêr’
Nê rojan babeta tewr germe vera kutikan “otanazî” yo. Îqtîdar wazeno ke wa kutikê qudizî û hêrişkarî otanazî bibê. Otanazî yunankî de yeno manaya “mergo bixêr”. Yanî tîranîye kutikan dana kiştene. La hetêk ra zî zerrîya xo kutikan rê “vêşena”. Seke ma bonder bîyî, tîranîye nê gaman erzena la kesêkê pisporî ra qet zanayîş û pêşnîyazan nêgêna. Oxina ke Yewîya Doktoran ê Baytaran ra pers bikerdêne, aye rayîr nîşan dayêne. Yewîya Doktoran ê Baytaran qetî duştê otanazî ya. Îqtîdar bi çekuya otanazî “edeb-î kelam” keno. Yanî qetlîyamî nimino. Seke ma cor de vat tîranîye têna gananê merdeyan ra hez kena. Nika dore ameya kutikan. Yewna tîya de goşê Gogolî bêrê vingayene. Ey seba kitabê xo sernuşteyo “Ganê Merdeyî” dîyarkerdbî.
