Qoserê Mêrdînî de semedê paştdayîşê rayraşîyayîşê ke Stenbolî ra ver bi Colemêrgî vera xespkerdişê îradeyî dîya destpêkerdene serkêşîya TJA, DBP û DEM Partî de rayraşîyayîşêk ame kerdene.

Grûba ke verê Şaredarîya Qoserî de ameye têhet ver bi Meydanê Azadîye rayra şîye. Rayraşîyayîş de pankartê “Şaredarîyî yê ma yê, ma do destûr medê xespî” û dovîzê sey ”Şaredarîyî yê ma yê”, “Dest medê îradeyê mi ser”, “Ma do destûrê xespî medê” û “Jinên ciwan rê nadin qeyuman” ameyî kiriştene. Çalakîye de sloganê sey “Qeyûm îradeyê mi rê destê xo derg meke”, ”Jin, jiyan, azadî” û “Bijî berxwedana Colemêrg” ameyî vatene.
Rayraşîyayîşî ra dima Hemserekê DEM Partî yê Mêrdînî Mehmet Mehdî Tunçî qisey kerd. Tunçî bale ante texrîbatê qeyûman ke Kurdîstan de afirnayo û muhîmîya şaredarîyîya şarî ser û vat: “Qeyûm têna dizdîye û talan o.” Tunçî tecrîdo giran ê serê Serekê PKKyî Abdullah Ocalanî zî ard vîr û vat: “Sebebê heme probleman meseleya kurdan û polîtîkaya tecrîdî ya. Coka ganî nê polîtîkayî cade bêrê caverdayene û semedê çareserîye berê Îmraliyî bêrê akerdene.”

Badê qiseykerdişî hende panc deqayan çalakîya roniştişî ameye kerdene.
Bi eynî waştişî qezaya Hezexî ya Şirnexî de zî rayraşîyayîşêk ame organîzekerdene. Polîsan hêrişê şarî kerd.

Parlamenterê DEM Partî Newroz Uysale û Zekî Îrmez, îdarekarê DBPyî, Dayîkê Aştîye, hemşaredarê Hezex, Cizîre û Silopîya zî tede şar verê banê DEM Partî yê Hezexî de ame têhet û waşt ver bi şaredarîye rayra şiro. Polîsan verê girseyî girewt. Seba ke girseyî bi hawayêkê qerardarî waşt rayra şiro, polîsan hêrişê ci kerd. Hêriş de Hemşaredarê Hezexî Dogan Adibelî bi mertalê polîsan birîndar bî.

Qirseyo ke bi slogana “Şima do hesab bidê” cewabê hêrişê polîsan da, ablûqaya polîsan de çalakîya roniştişî kerde.