Dîroka şarê kurdî de xoverdayîşê roja 14ê Temmuze cayê taybet û muhîmî tepîşeno. Qabê şarê kurdî ra roja 14ê Temmuze roja mûqades a, roja pîroz a. Dîroka şarê kurdî de xoverodayîşê zîndanê Amedî xosero yew şoreş o. Adirê zîndanê Amedî verba heme jahrî ra, şarê kurdî ra bî derman. Kileya zîndanê Amedî heme koyê Kurdîstanî roşne kerdî. Tanya adirî koyî refişnayî û dişmenî xewf girot. Xoverdayîşê 14ê Temmuze verba îxanetî ra û teslîm girotişî ra, zincî ra zulmê hezar serran şikitî û perçe kerdî.

Kabeyê kurdan

Cûntaya 12yê Êlule bi taybetî zîndanê Amedî xo rê herêma pîlotî weçînaye. Çunkî hema hema bi zafin ra heme pêşengê PKKyî zîndanê Amedî de binê esaretî de  bîyî. Nê sebebî ra zî fikirîyayîşê dişmenî hem zahf sinsî û hem zî zahf xirab bî. Dişmenî xo bi xo vatêne “kabeyê kurdan zîndanê Amedî yo, eger ez nê kabeyê kurdan birijna, tar û mar bikera, kurdî hînê binê herre de vinî benê, ma serê înan zî beton kenê. Hînê kurdî zî emr bîllahî xo nêhesîyenê û esameyê kurdan zî nêmaneno.”

Kileya zîndanê Amedî

Camêrdê şarê kurdî planê dişmenî weş famkerdbî. Bi verên ra, verba nê îxanetî ra şêrê kurdan Mazlum Doganî xo canfeda kerd û mesajê xo hîrê çopanê kibrîtî reyde da. Kileya hîrê çopan berz bî û şewa çarine ganê xo da  adirî ver. No adir mezgê dişmenî de hewayê virsoyî kewt. 14ê Temmuze de zî Memet Xeyrî Durmuş, Kemal Pîr, Akîf Yilmaz û Alî Çîçekî rih, gan û bedenê xo girewa rojeyê mergî ra rana û manîfestoyê kurdan sernewe ra nuşt.

Rihê canfedayan

Çerxê dîyalektîkê şorişê kurdan sernewe ra raşt bî. Dîrokê têkoşînê kurdan de xoverdayîşê zîndanî û xoverdayîşê koyan têrey de pîya berz bî. Ewro zî bi mîlyonan kesî rihê xoverdayîşê 14ê Temmuze ra hêzê xo gênê. Xoverdayîşê 14ê Temmuze sernewe ra bîyayîşê şarê kurdî yo. Rihê 14ê Temmuze ra sernewe ra cuyayîş virazîya. Ewro zî ma deyndarê nê rihê canfedayan û cangorîyan ê. Na wesîleya serrgêra vîrameyîşê 14ê Temmuze ra, şaro kurd gere rihê şehîdan şad bikero. Pêvajoyê na roje rê wayîr bivejîyo. Ewro zî rihê 14ê Temmuze Kobanê û Efrîn de fîneno.

Tecrîdê Îmrali

Cûntaya 12yê Êlule xo sernewe ra dûbare kena. Faşîzmê AKPyî mîrasê Kenan Evrenî dewir giroto. Faşîzmê AKPyî bi verên ra hewayê zîndanê Amedî girawa Îmrali teslîm bigîro. Bi şexsê şarê kurdî de Rayverê Şarê Kurdî giroto binê esaretî û wazeno ke Rayverê Şarê Kurdî teslîm bigêro. Ewro bi tena girawa Îmrali binê tecrîdî de nîya, heme kurdî binê tecrîdî de yê. Bi serrano ke Rayverê Şarê kurdî ra yew xebere û hayî çinî ya. No hewa alamet, alametê qiyamî yo. Cergê Beştepe eşkeno  ke heme tewr rewşa qiyamî bivirazo. Nê sebebî ra ganî nê wareyî de heme kesî hayîdar bibê û rewşa tecrîdê Îmrali bişikîyo. Heme zîndanan de rewşa zulmê 12yê Êlule est a. Faşîzmê AKPyî sernewe ra rihê 12yê Êlule ganî keno. Ewro ganî Bakûrê Kurdîstanî de şaro kurd nê mîrasê xoverdayîşê 14ê Temmuze yê mûqadesî ra wayîr bivejîyo, xoverdayîşê xo berz bikero û tecrîdê Îmrali bişikno.