Îdareyê tirkan ge-ge xo goyneno ke înan dinya de reya verêne cinîyan rê heqa weçînayîş û ameyîşweçinitişî daye. Ewro merdim perseno gelo na rewşa ke Kurdistan de qewimîyena çi ya? Gelo kurdî kam ê? Eke ê sey hemwelatîyan hesibîyenê, çira îradeyê ci dest ra gêrîyeno? Yewzî tayînkerdişê qeyûman duştê qanûnê bingeyî yê derbekaran o. Goreyê maddeya 67. ya qanûnê bingeyî her hemwelatî wayîrê heqa weçînayîş û ameyîşweçînayîşî yo. La kurdî wayîrê na heqe nîyî. Nameyê na paradîgma “kolonyalîzm” o. Kurdî sey hemwelatî nê, sey “bende” yenê hesibnayene. Pergalê koledarîye yeno ferzkerdene. Gelo kurdî hemverê nê pergalî bêveng manenê? Qetî nê. Senî ke lolikê ardan xo vera parazîtanê “nosema” seveknenê, kurdî zî vera îşxalkeran şer kenê.
Colemêrg de 3yê hezîrane de qeyûm ame tayînkerdene. Çend rojî yo şaro kurd seba îradeyê xo kuçeyan de çalakîyan serûber keno. 13yê hezîrane de mîtîngêko gird qewimîya. Rojêke verî ma ameyî Colemêrg û yew keyeyî rê meyman bîyî. Çend nîqaşê balkêşî kerdî. Çimanê wayîranê keyeyî de hem bacîye estbî, hem zî hêvîye estbî. Hêvîye estbî, çike şaro kurd têkoşînê xo ra fek vera nêdano. Têkoşîn mifteyê reyayîşê kurdan o. Ma serê sibayî rawuştî û silamê Koyê Simbilî yê bimbarekî girewt. Nê koyî cuya xo de çi nêdî ke! Şer, pêkewtiş, qetlîyam, qirkerdiş, dej, kolonyalîzm. Ziwanê koyî bibo, kam çi zano derdanê xo senîn ano ziwan. Koyî vîrê kurdan ê.
Rihê Şêx Ûbeydûllahî
Dima ra ma turîkê xo girewtî, ginayî rayîrê partî. Bînaya partî de her cayê Kurdistanî ra sîyasetmedarî, aktîvîstî, îdarekarî ameyî. Merdim ewneno ke mîyanê şarî de paştîdayîşêko hîra est o. Bado wextê mîtîngî ame û şar vejîya raşteyan. Sey tradîsyon, polîsanê tirkan ablûqa rona. La zêde nêramîya. Axirê girseyan astengîye wedarnaye û resayî cayê çalakîyan. Raşteyê mîtîngî de rihê Şêx Ûbeydûllahî ameyêne hîskerdene. Senî ke şêxî hemverê Dewleta Osmanîyan têkoşînê azadîye kerd, ewro zî tornê ey vera despotan û tîranan “lej” kenê.
Ne ters ne îtaet
Warê mîtîngî de girseyan bi taybetî derheqê rejîmê seraye yê kanwaz û pûçbîyayeyî de sloganî eştî. Merdim yewna û yewna çimdarîye keno ke tîranîya Erdoganî têna bi destê kurdan yena rijnayene. Çike ne ters est o, ne zî îtaet. Çimanê şarî de no psîkolojî bi hawayêkê zelalî asayêne.
Xeylêk sîyasetmedaran û temsîlkaranê partîyan fikrê xo ard ziwan. Gama ke merdim heme qiseykerdişan ano pêser, fikrîyeno ke dewleta tirkan goreyê seserra 21. tênêgêrena. Na seserre de hema zî heqa weçînayîş û ameyîşweçinitişî qedexe kena. No reftar reftaro hovî yo. Na dewlete welatanê bînan de seba xelasîya tirkan her tewr dîplomasî kena, la key ke kurdî hemwelatîya têdûşte talep kenê, sey “terorîst” yenê pênaskerdene. Eke hetê hukmatê Erdoganî ra çekuyê sey “terorîzm” yan “xizmet” şuxilîyenê, ma bizanê ke uca de “kedewerdiş” est o. Qeyûmê Colemêrgî seba olîgarkan “rant” îfade keno. Seba ke rantî binimnê, çekuya “terorîzmî” xebitnenê.
