Sîyasetmedaro kurd Fuat Kav ke Zîndanê Dîyarbekîrî de mend ANFyî rê qala manîfestoya xoverdayîşî ya şorişgêranê PKKyî ya vera konseptê îmhayî kerd. Qiseykerdişê Kavî ra qismêk wina yo:

“Zîndanê Dîyarbekîrî de vera netewêke, vera şarêkî wehşet ame kerdene. Vera tepişteyanê kurdan, kadroyanê serkêşan ê PKKyî îşkence ame kerdene. Kesê ke uca raştê îşkenceyî ameyênî, semedê xelisnayîşê Kurdistanî û azadîya şarê kurdî uca de bê. Zîndanê Amedî de şexsê tepişteyan de ame waştene ke îradeyê kurdan bêro şiknayene. Sey Hîtlerî înan zî waşt kurdan çin bikerî. Afernayoxanê rejîmê 12ê Êlule semedê teslîmgirewtişê Zîndanê Amedî projeyî, konseptî hazir kerdbî. Waştişê înan teslîmgirewtişê tepişteyan bî. Waştişê tepişteyan zî xoverdayîş û serkewtiş bî. Tepişteyan PKK, netewa kurdan û şaro kurd pawitêne.

Îşkenceyo ke tepişteyan rê nêame kerdene nêmend la rixmê heme îşkenceyan tepişteyan xover da. Îşkenceyo tewr pîl qexekerdişê kurdkî bî. Ma nêeşkayêne merdimanê xo reyde kurdkî qisey bikerê û merdimanê ma zî tirkî nêzanayêne. Eke vera nê kerdişan çîyêk nêameyêne kerdene, uca qirkerdişêk ameyêne kerdene. Coka embaz Mazlûm Doganî bi çalakîya xo vat hinî bes o û xerîtaya rayîrî zelal vete werte. Embazanê bînan zî nê rayîrî de xoverdayîşê xo domna. Çalakîya Mazlûm Doganî cîya bîye, çalakîyanê çaran cîya bîye û çalakîya 14ê Temmuze cîya bîye. Nê çalakîyî pêro pabesteyê yewbînan bîyî, yewbînî kerdî temam la sey yewbînan nêbî.”