Hemserekê TUHAD-FEDî yê Amedî Kerem Canpolatî îfade kerd ke eke tecrîd qedîyeno, faşîzm zî rijîyeno.

Tepişteyê dewaya PKK û PAJKî seba azadîya Serekê PKKyî Abdullah Ocalanî û çareserîya meseleya kurdan 27ê teşrîna peyêne ya 2023yî ra nata grevê vêşanîye de yê. 4ê nîsane de grevê vêşanîye derbazê safhaya diyîne bî. Tepişteyî mehkemeyan boykot kenê û nêşinê pêvînayîşan û telefonan ser.

Canpolatî ard ziwan ke nêzdîyê 5 mengan o Kurdistan û Tirkîya de seba wedaritişê tecrîdî çalakîyê xurtî yenê kerdene û vat: “Ganî çalakîyê winayênî bizêdîyê. Şexsê Birêz Ocalanî de pêro tepişteyan û komelî rê tecrîd yeno caardene. Derheqê grevê vêşanîye de ganî ma xo rexne bikerê ke bi qîmî na babete nêanê rojdemî. Ganî ma plansazîyanê xo bikerê. Dadîyî Nobeta Edaletî de yê; ganî ma paştî bidê înan. Ma wazenê ke wa her kes vera tecrîdî vengê xo berzêr bikero.

Dadîyî wina pêşnîyaz kenê ke ma şorê Meclîsî, Wezîrîya Edaletî, verê zîndanan de eşkerayîyan bidê û partîyan de pêvînayîş bikerê. Ma nê pêşnîyazan ercnenê. Ma do rojanê verê ma de plansazîya xo komelî rê eşkera bikerê. Xoverdayîşê şarî eşkeno heqê her çî ra bêro. Ma na raştîye Wan de dîye. Tecrîd meseleya welatî ya tewr giran a. Wedaritişê na mesele destê ma de yo. Qedînayîşê tecrîdî yeno manaya rijnayîşê faşîzmî.”