Sekretera Malî ya KESKî Gonul Kural Şîmşeke dîyar kerd ke rojdemê serekî yê kedkaran krîzo ekonomîk o û wina vat: “Polîtîkayê ekonomî yê îqtîdarî hetê sermayedaran de yê.”
Sekretera Malî ya Konfederasyonê Sendîkayanê Kedkaranê Umûmîye (KESK) Gonul Kural Şîmşeke ANFyî rê qisey kerd.
Şîmşeke vist vîrî ke beşêkê pîlî yê butçe 2022 de şerî rê ame xerckerdene û vat: “AKP pê polîtîkayanê şerî, pê vateyanê nîjadperestan kedkaran yewbînan ra cîya keno û bi nê hawayî vengê xo zêdîneno. La hînî polîtîkayê şerî, operasyonê teberê sînorî mîyanê kedkaran de nênê qebulkerdene. Rojdemê serekî yê kedkaran krîzo ekonomîk o. Polîtîkayê ekonomî yê îqtîdarî hetê sermayedaran de yê. Îqtîdar pê qiseyan xo wina mojneno ke seke dostê şarî yo. Labelê polîtîkayê ci yê ekonomîkî mabênê dewlemend û xizanan de cîyatîyî zêdînenê. Kedkarê umûmîye binê xizanîye de yê. Meaşo asgarî mîyanê çend mengan de resayo asta bêhukme.”
Şîmşeke ard ziwan ke îqtîdar teber û zerre de xo rê dişmenan aferneno, bi nê hawayî zî kaosî weye keno. Şîmşeke vat: “Çîyêko cîya destê ci de nêmend bişuxilno. Nê pêro mojneno ke îqtîdar senî teng bîyo. Tepiştişê 16 rojnamegeran zî parçeyêkê nî yo. Ganî karkerî nêkewê dafika îqtîdarî û tewirêkê hemparî bimojnê. Kedkarê kurd, tirk, ereb û ê bînî têkoşînê hemparî ra ber yew şensê înan çin o. Heta ke ma vera şerî tewirêkî nêmojnê, vera şerî cepheyêkê xurtî awan nêkerê, kedkarî do tim bêrê cîyakerdene.”
