Sîyasetmedara kurde Aysel Dogana vizêrî Basel û Dortmund de ameye yadkerdene.
Sîyasetmedara kurde Aysel Dogana ke 11ê gulane de kanserî ra Almanya de şehîd bîbî, vizêrî şaristanê Dortmundî yê Almanya û şaristanê Baselî yê Swîsre de ameye yadkerdene.
Dortmund de Komelê Demokratîkî yê Kurdan de merasîmêkê yadkerdişî ame kerdene. Merasîm bi merşê Ey Reqîbî dest pêkerd. Merasîm de nameyê YJK-E ser o Kezban Dogane, nameyê TJK-E ser o Besîme Konca, nameyê keyeyê Aysel Dogane ser o Pinar Mansuroglu, nameyê FEDA ser o Ayfer Kilinçe û nameyê KOMAWî ser o Şengê Kahramane qisey kerd.
Qiseykerdişan de ame vatene ke Aysel Dogane têkoşînê xo yê 40 serrî de heta hela peyêne pê ruhê xoverdayîşê Zapî xo ver da û ganî aye de wayîrê şehîdan bêro vejîyayene. Merasîm de sînevîzyonêk ame mojnayene û loqmayî ameyî vilakerdene.
Basel de zî serkêşîya YJK-S û KOMAWî de Merkezê Komelê Demokratîkî yê Kurdan de merasîmêk ame kerdene. Merasîm de Salis Cizîr (Hasan Bozkurt), Huseyîn Akdag (Selam Bozkur) û Ferhad Şiblî zî ameyî yadkerdene. Qiseykerdişan de ame vatene ke Aysel Dogane kesa xoverdayoxe bîye û verê dewlete de qetî milê xo çewt nêkerd. Merasîm de derheqê têkoşînê Aysel Dogane de sînevîzyonêk ame mojnayene û mesajê Murat Karayilanî yê serê şehadetê Dogane ame seyrkerdene. Merasîm pê sloganan qedîya.
