Hemvervatoxa HDKyî ya Anqara Dîlek Yilmaze îfade kerd ke qetilkerdişê Denîz Poyraze birastî hêrişê vera îradeyê şarê kurdî bî.

Denîz Poyraze 17ê hezîrana 2021î de bînaya HDPyî ya Îzmîrî de amebî qetilkerdene. Denîz Poyraze sey xeylêk şaristanan Anqara de zî ameye yadkerdene.

Hemvervatoxa HDKyî ya Anqara Dîlek Yilmaze ANFyî rê qisey kerd û ard ziwan ke qetilkerdişê Denîz Poyraze a raşte hêrişê vera HDPyî yo.

Dîlek Yilmaze dîyar kerd ke kiştox Onur Gencer bi rehetî kewt zere û ey Denîze narê bînaya partîye de kişte. Dîlek Yilmaze vat: “No çi welatêkê bînî de biameyêne kerdene o welat weriştêne payan ser. No qetlîamê bînaya HDPyî nêno manaya ke vera aktîvîstêka HDPyî ameyo kerdene. No hêriş vera îradeyê şarê kurdî ame kerdene. Dewlete û hêzanê ci yê paramîlîteran bi nê hawayî cewab da têkoşînê demokratîkî. 20 serranê AKPyî û 6 serranê koalîsyonê AKP-MHPyî de vera HDPyî têgêrayîşê antîdemokratîkî yenê kerdene.”

Yilmaze eşkera kerd ke polîtîkaya înkarê kurdan dewam kena û kerdişê faşîst û tekperestî bi israrî dewre de yê. Yilmaze vat: ”Tirkîya de demokrasî qetî nêameye dîyene. Cinîyê ke seba azadîya cinîyan têkoşînê femînîstî kenê, qetî do waran û kuçeyan war meverdê. Wexto ke embaza ma Denîz Poyraze ameye qetilkerdene, xeylêk rêxistinan paştî daye ma. Wexto ke ma kuçeyan de bîyî, cinîyê kurdî zî kuçeyan de bîyî.”