Veradayîşê rojnamegere Derya Rena ke Zîndanê Cinîyan ê Amedî yê Girewteyî de tepişte ya bi bahaneya cezaya dîsîplînî 3 mengî ame taloqkerdene.
Muhabîra JINNEWSî Derya Rene çarçewa tehqîqatêkê ke merkezê ci Anqara bî de 25ê teşrîna verêna 2022yî de sereştişê keyeyan de ameye destbendkerdene û badê kê dosyaya ci ameye tesdîqkerdene tepişîyaye. Veradayîşê Rene bi bahaneya cezaya dîsîplînî 3 mengî ame taloqkerdene.
Mehkemeya Cezaya Giran a 6. a Riha bi sucdarkerdişê “rêxistine rê hişmendane û bi waştişî hetkarîye kerdene” cezaya 3 serran 13 mengan 15 rojan dabî Rene. Badê ke na ceza serra 2022yî de bi destê Mehkeme Berze ya Temyîzî tesdîq bîye, Rene seba veradîyayîşê şertinî 31ê tebaxa 2023yî de Dadgerîya Înfazî ya 1. a Amedî rê waştişname erşawit. Dadgerîye 17 teşrîna verêne de talebê Rene bi bahaneya nêvurîyayîşê koxuşe red kerd.
Rena ke 6ê gulane de veradayîş pawêne rê hetê Heyetê Îdare û Çimdarîye ra sucê dîsîplînî sey bahane ame mojnayene û veradayîşê aye 3 mengî ame taloqkerdene.
