Hetkarê Serekê Pêroyî yê AKPyî Efkan Ala Ewropa de kampanyaya vîjnayîşî rayra beno û welat bi welat vengê Erdoganî dano goşdarîkerdene.
Hewteyanê peyênan de hukmatê tirkî ra xeylêk wezîr û hetkarê wezîran, parlamenter û îdarekarê payeberzî sere de Almanya welatanê Ewropa gêrene û kampanyaya vîjnayîşî rayra benê.
Hukmatê almanî verê vîjnayîşan ameyîşê Serekkomarê Tirkî Recep Tayyip Erdoganî vindarna û tay zîyaretê ci yê Berlin û bajaranê bînan betal kerdî. Erdoganî Hetkarê Serekê Pêroyî yê AKPyî û Serekê Têkîlîyanê Teberî Efkan Ala şawit. Ala welatanê Ewropa yew bi yew gêreno û kombîyayîşan de telefonî ra vengê Erdoganî dano goştarîkerdene.
Welatanê Ewropa verê referandûmê 2017î xebatê vîjnayîşî yê AKPyî qedexe kerdbî û no bîbî sebebê krîzî. Naye ser o îqtîdarê AKP-MHPyî kampanyaya vîjnayîşî binê nameyê “Ma bi tirkanê Ewropa yenê têhet” organîze kerdî.
Kombîyayîşo ke Ala, xeylêk îdarekarê AKPyî, parlamenterê verên û neweyî tewrê ci bîyî de Erdogan zî pê telefonî tewrê ci bî. Qedexeyê propagandaya vîjnayîşî yê welatanê Ewropa xeymê Erdoganî de nîyo. Her kombîyayîşî de pê telefonî propaganda keno. Xora çend rojî verî dîmenanê kombîyayîşanê Hollanda û Belçîka yê ke sey mîtînganê vîjnayîşî ameyî kerdene de amebî vînayene ke Erdogan senî qala vîjnayîşî keno.
Badê Fransa, Belçîka û Hollanda Efkan Ala û ekîbê ci ravêrtî Almanya. Îdarekarê AKPyî di rojî yo merkezê dezgehê lobî yê UIDyî yê AKPyî de têdima kombîyayîşan kenê û xebatanê propaganda yê Almanya ke tede 1,5 mîlyon vîjnayoxî est ê, gênê dest. Aşma adare de binê nameyê “têhetameyîşê kulturî”, “têhetameyîşê şarî” û “têhetameyîşê ciwanan” de xeylêk bajaran de do kombîyayîşê propagandaya vîjnayîşî yê AKPyî bêrê kerdene.
