Nalîne Mardîna ke 21 serran de çar cayanê cîyayan de ameye definkerdene û keyeyê ci ra ameye remnayene badê 21 serran pîya bi puncanê ci ke gama ke şehîd bîye linga ci de bi zereyê qutîyêka plastîke de teslîmê keyeyê ci bîye.
Dewa Oleka Corî ya girêdayîya merkezê Bedlîsî de cenazeyê ke tarîxanê cîya-cîyayan de wefat kerdo, 19ê Kanûne 2017î de ameyî remnayene û demo derg înan ra xeberê naêmeyî girewtene. Dima ra ame eşnawitene ke cenazayî ameyî berdene Sazîya Tibê Edlîyî ya Stenbolî û pey ra eşkera bi ke nê cenazayî Goristanê Bêkesan ê Kîlyosî de kişta rayîrî de ameyî definkerdene. Cenazayê ke Şehîdgehê Garzanî ra bi remnayîşî ameyî berdene Stenbolî ra nînan ra esteyê Nadîre Elma (Nalîne Mardîn) badê 21 serran qutîyêk de dîyayî keyeyê ci.
Nadîre ya mardînije 1992 de hema ke 14 serrî bî vera terorê dewlete sere dart we û tewrê PKKyî bîye. 1999 de qezaya Hawêlî ya Sêrtî de pêkewitşêk de pîya bi hîrê embazanê xo şehîde bîye. Keyeyê ci xebera şehadetê kênaya xo 2007 de eşnawit. Nalîne Mardîna ke 21 serran de çar cayanê cîyayan de ameye definkerdene û keyeyê ci ra ameye remnayene badê 21 serran pîya bi puncê ci ke gama ke şehîd bîye linga ci de bi zereyê qut, yêka plastîke de teslîmê keyeyê ci bîye. Nalîne Mardîn kişta gorê babîye ci ke kênaya xo rê hesret dinyaya xo bedilnaye de ameye definkerdene.
‘Ma bi serran nêeşkayî cenaza ci bigîrê’
Dadîye Mecbure Elma ya ke esteyê kênaya xo yê ke kişta rayîrê Goristanê Kîlyosî de definkerdebî girewtî ANFyî rê qisey kerd. Mecbure Elma vat: ”Kênaya mi 8 serrî koyan de mende û dima ra şehîd bîye. Ma şehadetê ci erey eşnawit û bi serran nêeşkayî cenaza ci bigîrê. Bado ke ma eşnawit Olek de ya ma şîyî kerraya gorê ci dîye. Hema ke babîyê ci gorê ci nêdî bi ma xeberan de eşnawit ke goristan ameyo rijnayene û cenazayî ameyî remnayene. Dima ra ma xebere girewte ke cenazaya ma Stenbol de ya. Ma ameyî ke goristan çîn o, zereyê qutîyêka plastîke de esteyê kênaya mi dayî ma. Zaf zorê ma şi. Nayî zorêr çîyêk çîn o.
‘Bedenanê bêganan rê îşkence kenê’
Gama ke ma esteyî girewtî, ma dîyî ke qutî de puncê aye zî estê. 21 serrî yo kênaya mi pîya bi puncanê xo definkerdebîya. Di çutê puncan pêser kerdî pay. Ma yew çut pîya bi aye defin kerd. Cenazaya kênaya mi çar bajaran ra gêraye û cayanê cîya cîyayan de ameye definkerdene. Bêwijdanan ma vînayîşê gorêk zî zaf dî. Bedenanê bêganan rê hende îşkence kenê. Xora domanê ma vera nê zulmê înan vejîyayî, şehîd bîyî. Ma welatê xo de serbest nîyê. Lajê mi yo ke Almanya de yo nêeşka bêro cenazaya babîye xo ser. Kênaya min a ke mi 21 serrî yo nêdîya puncê aye mi rê ameyî. Ma esteyê xo girewtî wa cenazayê keyeyanê bînan zî bêrê dayene.” Çime: Anf
