Hetkarê Hemserekanê Pêroyîyan ê DEM Partî Tayîp Temelî ard ziwan ke rixmê pêro qirkerdişan çapemenîya kurdan rêçê raştîye de ya û Roja Rojnamegerîya Kurdan fîraz kerde.

Temelî vist vîrî ke 22yê nîsana 1898î de Kahîre de hetê Mîqdad Mîdhed Bedirxanî ra Rojnameya Kurdistanî amebî vetene û na roje sey Roja Rojnamegerîya Kurdan yena fîrazkerdene. 

Temelî pare kerd ke ê wextî ra nata rojnamegerê kurdî raştîyan teqîb kenê û resnenê şarî. Temelî bale ante ser ke serranê 90an ê tarîyan de zî rojnamegerîya kurdan rixmê her çî zî roşnîya xo pawite û bi qerardarî rayîrê xo rê dewam kerd. 

Temelî vat: “Ma Roja Rojnamegerîya Kurdan sere de Mîqdat Mîdhed Bedirxanî rê pêro kedkar û xebatkaranê çapemenîya kurdan rê fîraz kenê. Ma şexsê Musa Anter, Gurbetelî Ersoz, Nagîhan Akarsel, Hafiz Akdemîr û Huseyîn Denîzî de pêro şehîdanê çapemenîya kurdan bi rêz û minetî yad kenê. Vîrameyîşê înan, mîrasê înan ê têkoşînî û xoverdayîşê înan do tim rayîrê ma roşnî bikerê.”